തിരുവനന്തപുരം: പോപ്പുലര്‍ ഫ്രണ്ട് ഓഫ് ഇന്ത്യയെ നിരോധിക്കണമെന്ന് ഡി.ജി.പിമാരുടെ യോഗത്തില്‍ കേരളം ആവശ്യപ്പെട്ടതായി വെളിപ്പെടുത്തല്‍.
വിവാദമായപ്പോള്‍ വാര്‍ത്ത നിഷേധിച്ച് ഡി.ജി.പിയും മുഖ്യമന്ത്രിയും രംഗത്തെത്തി. ദി ഹിന്ദു ദിനപത്രമാണ് കേന്ദ്ര ആഭ്യന്തര സഹമന്ത്രി കിരണ്‍ റിജിജുവിനെയും യോഗത്തില്‍ പങ്കെടുത്ത മറ്റു ഉന്നത ഉദ്യോഗസ്ഥരെയും ഉദ്ധരിച്ച് വാര്‍ത്ത പുറത്തുവിട്ടത്. ഇതിനുപിന്നാലെ മുഖ്യമന്ത്രിയുടെ ഓഫിസ് വാര്‍ത്ത നിഷേധിച്ചു. പ്രബന്ധം അവതരിപ്പിക്കുക മാത്രമേ ചെയ്തിട്ടുള്ളൂവെന്നും നിരോധിക്കാന്‍ ആവശ്യപ്പെട്ടിട്ടില്ലെന്നും പൊലിസ് മേധാവിയും പത്രക്കുറിപ്പിറക്കി. പിന്നാലെ മുഖ്യമന്ത്രിയുടെ വിശദീകരണവുമെത്തി.
മധ്യപ്രദേശിലെ തെക്കാന്‍പൂരില്‍ കഴിഞ്ഞ മാസം ആറിനും ഏഴിനും നടന്ന സംസ്ഥാന പൊലിസ് മേധാവികളുടെ യോഗത്തില്‍ ഡി.ജി.പി ലോക്‌നാഥ് ബെഹ്‌റ, പോപ്പുലര്‍ ഫ്രണ്ടിന്റെ പ്രവര്‍ത്തനങ്ങളും വളര്‍ച്ചയും സംബന്ധിച്ച വിശദ വിവരങ്ങള്‍ അവതരിപ്പിക്കുകയായിരുന്നു. പോപ്പുലര്‍ ഫ്രണ്ട് പ്രതിസ്ഥാനത്തുള്ള കേസുകളും ബെഹ്‌റ വിശദീകരിച്ചു.
പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തര മന്ത്രി രാജ്‌നാഥ് സിങ്, മറ്റ് മുതിര്‍ന്ന ഉദ്യോഗസ്ഥര്‍ എന്നിവര്‍ പങ്കെടുത്ത യോഗത്തില്‍വച്ചാണ് കേരളാ പൊലിസ് മേധാവി പ്രബന്ധം അവതരിപ്പിച്ച് പോപ്പുലര്‍ ഫ്രണ്ട് ഓഫ് ഇന്ത്യയെ നിരോധിക്കണമെന്ന് ആവശ്യപ്പെട്ടതത്രേ.
പോപ്പുലര്‍ ഫ്രണ്ട് പ്രതിസ്ഥാനത്തുള്ള കേസുകള്‍ പവര്‍ പോയിന്റ് പ്രസന്റേഷനിലൂടെ ഡി.ജി.പി യോഗത്തില്‍ വിശദീകരിച്ചു.
കേരളത്തിലാണ് പോപ്പുലര്‍ ഫ്രണ്ടിന്റെ കേന്ദ്രമെന്ന നിലയിലാണ് സംഘടനക്കെതിരേ ബെഹ്‌റ നിലപാട് സ്വീകരിച്ചതെന്നും നിരോധനത്തിന് മുന്‍പ് നിരവധി നടപടികള്‍ പൂര്‍ത്തീകരിക്കേണ്ടതുള്ളതിനാല്‍ രണ്ട് മാസമെങ്കിലും കഴിഞ്ഞേ ഇത് സംബന്ധിച്ച പ്രഖ്യാപനമുണ്ടാകൂ എന്നും ആഭ്യന്തര മന്ത്രാലയത്തിലെ ഉദ്യോഗസ്ഥന്‍ പറഞ്ഞതായും ഹിന്ദു റിപ്പോര്‍ട്ട് ചെയ്യുന്നു.