ധരംശാല: ഡല്‍ഹിക്ക് പിന്നാലെ ഉത്തര്‍ പ്രദേശിനേയും കീഴടക്കി കേരളം. വിജയ് ഹസാരെ ട്രോഫി ഏകദിന ക്രിക്കറ്റ് പോരാട്ടത്തില്‍ കേരളം അഞ്ച് കളികളില്‍ മൂന്നാം വിജയം സ്വന്തമാക്കി പോയിന്റ് പട്ടികയില്‍ രണ്ടാം സ്ഥാനത്തേക്ക് കയറി. യു.പിക്കെതിരേ 120 റണ്‍സിന്റെ ഉജ്ജ്വല വിജയമാണ് കേരളം സ്വന്തമാക്കിയത്. ആദ്യം ബാറ്റ് ചെയ്ത കേരളം നിശ്ചിത 50 ഓവറില്‍ ഒന്‍പത് വിക്കറ്റിന് 261 റണ്‍സെന്ന ഭേദപ്പെട്ട സ്‌കോര്‍ സ്വന്തമാക്കിയപ്പോള്‍ ഉത്തര്‍ പ്രദേശിന്റെ മറുപടി 39.2 ഓവറില്‍ 141 റണ്‍സില്‍ അവസാനിപ്പിച്ചാണ് കേരളം വിജയിച്ചത്. മൂന്ന് വീതം വിക്കറ്റുകള്‍ വീഴ്ത്തി സന്ദീപ് വാര്യര്‍, കെ.സി അക്ഷയ് എന്നിവര്‍ മികച്ച ബൗളിങ് പുറത്തെടുത്ത് യു.പിയെ കുഴക്കി. സച്ചിന്‍ ബേബി രണ്ടും എം.ഡി നിധീഷ്, ഫാസില്‍ ഫനൂസ് എന്നിവര്‍ ഓരോ വിക്കറ്റുമെടുത്തു. 31 റണ്‍സെടുത്ത മുഹമ്മദ് സെയ്ഫാണ് യു.പിയുടെ ടോപ് സ്‌കോറര്‍.
നേരത്തെ ടോസ് നേടി കേരളത്തിനെ ബാറ്റിങിനയച്ച ഉത്തര്‍ പ്രദേശിന്റെ കണക്കുകൂട്ടല്‍ തെറ്റിപ്പോയി. തുടക്കത്തില്‍ തന്നെ ഓപണര്‍ വിഷ്ണു വിനോദിനെ മടക്കാന്‍ അവര്‍ക്ക് സാധിച്ചെങ്കിലും സഹ ഓപണര്‍ ജലജ് സക്‌സേന (37), പിന്നീടെത്തിയ രോഹന്‍ പ്രേം (പുറത്താകാതെ 66), അരുണ്‍ കാര്‍ത്തിക് (54), ക്യാപ്റ്റന്‍ സച്ചിന്‍ ബേബി (38) എന്നിവരുടെ ബാറ്റിങ് കേരളത്തിന് മാന്യമായ സ്‌കോര്‍ സമ്മാനിക്കുകയായിരുന്നു. യു.പിക്കായി മൊഹ്‌സിന്‍ ഖാന്‍ നാല് വിക്കറ്റുകളെടുത്തു. ജയത്തോടെ 14 പോയിന്റുമായാണ് കേരളം രണ്ടാം സ്ഥാനത്തെത്തിയത്. 16 പോയിന്റുമായി ഡല്‍ഹിയാണ് ഗ്രൂപ്പ് ബിയില്‍ ഒന്നാം സ്ഥാനത്തുള്ളത്.