മാഡ്രിഡ്: റെക്കോര്‍ഡുകള്‍ പുത്തരിയല്ലാത്ത ക്രിസ്റ്റ്യാനോ റൊണാള്‍ഡോ ഒരപൂര്‍വ ബഹുമതിയും സ്വന്തം പേരിലാക്കി. ചാംപ്യന്‍സ് ലീഗ് ഫുട്‌ബോള്‍ പോരാട്ടത്തിന്റെ ചരിത്രത്തില്‍ ഒരു ടീമിന് വേണ്ടി 100 ഗോളുകള്‍ നേടുന്ന ആദ്യ ഫുട്‌ബോള്‍ താരമെന്ന ഒരു കാലത്തും തകര്‍ക്കപ്പെടാത്ത റെക്കോര്‍ഡാണ് താരം നേടിയത്.
പി.എസ്.ജിക്കെതിരായ പ്രീ ക്വാര്‍ട്ടര്‍ പോരാട്ടത്തില്‍ റയല്‍ മാഡ്രിഡിന് വേണ്ടി ഇരട്ട ഗോളുകള്‍ നേടിയാണ് ക്രിസ്റ്റ്യാനോ അപൂര്‍വ നേട്ടത്തിലെത്തിയത്.
മത്സരത്തില്‍ തന്റെ ആദ്യ ഗോള്‍ പെനാല്‍റ്റിയിലൂടെ വലയിലാക്കി 100 തികച്ച പോര്‍ച്ചുഗല്‍ നായകന്‍ 83ാം മിനുട്ടില്‍ രണ്ടാം ഗോളിലൂടെ നേട്ടം 101ലും എത്തിച്ചു.
95 ചാംപ്യന്‍സ് ലീഗ് പോരാട്ടത്തില്‍ നിന്നാണ് ക്രിസ്റ്റ്യാനോയുടെ നേട്ടം. 97 ഗോളുകളുമായി ബാഴ്‌സലോണയുടെ ലയണല്‍ മെസ്സിയാണ് തൊട്ടുപിന്നിലുള്ളത്.
ഈ അപൂര്‍വ നേട്ടത്തിനൊപ്പം മറ്റ് റെക്കോര്‍ഡുകളും ഇന്നലത്തെ മത്സരത്തില്‍ ക്രിസ്റ്റ്യാനോ ഒപ്പം ചേര്‍ത്തു. ചാംപ്യന്‍സ് ലീഗിലെ ആദ്യ ഏഴ് മത്സരങ്ങളിലും ഗോള്‍ നേടുന്ന ആദ്യ താരം, തുടര്‍ച്ചയായി ഏഴ് ചാംപ്യന്‍സ് ലീഗ് സീസണുകളില്‍ പത്തിലധികം ഗോള്‍ നേടുന്ന ആദ്യ താരം എന്നീ റെക്കോര്‍ഡുകളാണ് താരം സ്വന്തമാക്കിയത്.