കടുത്തുരുത്തി: കേരളം ഭരിച്ച ഇടത്, വലത് സര്‍ക്കാരുകള്‍ ജനങ്ങളെ വഞ്ചിക്കുകയായിരുന്നുവെന്ന് പി.സി ജോര്‍ജ് എം.എല്‍.എ. ഇന്ത്യ പെന്തക്കോസ്താ ദൈവസഭ (ഐ.പി.സി) വൈക്കം സെന്ററിന്റെ നേതൃത്വത്തില്‍ കുറുപ്പന്തറ പഞ്ചായത്ത് മൈതാനത്ത് നടന്ന വജ്രജൂബിലി കണ്‍വന്‍ഷന്റെ സമാപന സമ്മേളനം ഉദ്ഘാടനം ചെയ്യുകയായിരുന്നു അദേഹം. തമിഴ്‌നാട്ടിലെ രാഷ്ട്രീയകക്ഷികള്‍ ജനങ്ങളുടെ നേട്ടത്തിനും നാടിന്റെ വികസനത്തിനും വേണ്ടത് ചെയ്യുമ്പോള്‍, കേരളത്തിലെ രാഷ്ട്രീയ കക്ഷികളും നേതാക്കളും അഴിമതിയും സ്വജനപക്ഷപാതവുമാണ് നടത്തുന്നതെന്നും പി.സി ജോര്‍ജ് കുറ്റപെടുത്തി.
കേരളത്തില്‍ ഏല്ലാവിഭാഗം ജനങ്ങള്‍ക്ക് പ്രയോജനമുണ്ടാകുന്ന നാലാമതൊരു മുന്നണി ഉടന്‍ ഉണ്ടാകുമെന്നും പി.സി. ജോര്‍ജ് പറഞ്ഞു. നാടിന് ഐ.പി.സി നല്‍കിയ ആംബുലന്‍സ് സര്‍വീസിന്റെ താക്കോല്‍ദാനവും പി.സി ജോര്‍ജ് നിര്‍വഹിച്ചു. വൈക്കം സെന്റര്‍ പ്രസിഡന്റ് പാസ്റ്റര്‍ രാജു ആനിക്കാട് സമ്മേളനത്തില്‍ അധ്യക്ഷത വഹിച്ചു. ജൂബിലി വര്‍ഷത്തോടുനുബന്ധിച്ചു പുറത്തിറക്കിയ സ്മരണിക പ്രകാശനം മോന്‍സ് ജോസഫ് എം.എല്‍.എ നിര്‍വഹിച്ചു. തൊഴില്‍ പരിശീലന പ്രവര്‍ത്തനം, ജീവകാരൂണ്യ സഹായവിതരണം എന്നിവയും സമ്മേളനത്തില്‍ നടന്നു.