മലപ്പുറം: മുന്‍ എം.പിയും ഡോ.ബി.ആര്‍ അംബേദ്കറുടെ കൊച്ചുമകനുമായ പ്രകാശ് അംബേദ്കര്‍ പാണക്കാട് സയ്യിദ് ഹൈദരലി ശിഹാബ് തങ്ങളെ സന്ദര്‍ശിച്ചു. രാജ്യത്ത് നടന്നുകൊണ്ടിരിക്കുന്ന വര്‍ഗീയ ധ്രുവീകരണത്തിനെതിരേ മതേതര കക്ഷികള്‍ കൂടുതല്‍ ജാഗ്രത പുലര്‍ത്തേണ്ടത് അനിവാര്യമാണെന്നും ഇതിനുവേണ്ടിയുള്ള മുസ്്‌ലിംലീഗിന്റെ പ്രവര്‍ത്തനങ്ങള്‍ പ്രതീക്ഷ നല്‍കുന്നതായും അദ്ദേഹം അഭിപ്രായപ്പെട്ടു. 'ദലിത് - മുസ്്‌ലിം സാഹോദര്യം അതിജീവനം സംസ്‌കാരം രാഷ്ട്രീയം' എന്ന പ്രമേയത്തില്‍ പിറ്റ്‌സ മലപ്പുറത്ത് നടത്തുന്ന സെമിനാര്‍ ഉദ്ഘാടനം ചെയ്യാനാണ് അദ്ദേഹം എത്തിയത്. മുസ്്‌ലിംലീഗ് ദേശീയ സെക്രട്ടറി പി.കെ കുഞ്ഞാലിക്കുട്ടി എം.പി, പി.വി അബ്ദുല്‍ വഹാബ് എം.പി, കെ. കുട്ടിഅഹമ്മദ് കുട്ടി, കെ.പി.എ മജീദ്, പ്രകാശ് അംബേദ്കറിന്റെ ഭാര്യ അഞ്ജലി മെയ്‌ദേയോ, ഡോ.എം.ബി മനോജ്, ഡോ. കെ.എസ് മാധവന്‍, ശിബി പീറ്റര്‍, ഡോ. ഫൈസല്‍ മാരിയാട്, ശരീഫ് ചെമ്മാട്, കെ. അബൂബക്കര്‍, സിറാജുദ്ദീന്‍ നദ്‌വി, എം അബ്ദുല്‍ ജലീല്‍ എന്നിവരും സംബന്ധിച്ചു.