കൈതക്കല്‍: തെരുവുനായകളുടെ ശല്യത്തില്‍ പൊറുതിമുട്ടി കൈതക്കല്‍ പ്രദേശം. രാത്രികാലങ്ങളിലാണ് കൂട്ടമായും ഒറ്റയായും എത്തുന്ന തെരുവുനായകള്‍ പ്രദേശത്ത് ഭീതി പരത്തുന്നത്. ഇതു കാരണം പ്രദേശവാസികളുടെ സഞ്ചാരത്തിന് വരെ ഭീഷണിയായിരിക്കുകയാണ്. കഴിഞ്ഞ ദിവസം രാത്രി ജോലി കഴിഞ്ഞ് വീട്ടിലേക്ക് വരികയായിരുന്ന യുവാവിന് തെരുവു നായകളുടെ ആക്രമണത്തില്‍ പരുക്കേറ്റിരുന്നു. കൈതക്കല്‍ സ്വദേശി എസ്.എ റാഫിക്കാണ് പരുക്കേറ്റത്. ഇയാളുടെ ഇടതു കൈയ്യിനാണ് കടിയേറ്റത്. കൈതക്കല്‍ കാപ്പിമില്ലിനടുത്ത് വച്ചാണ് ഇയാള്‍ക്കു നേരെ തെരുവുനായകളുടെ ആക്രമണമുണ്ടായത്. പ്രദേശത്തെ വളര്‍ത്തുമൃഗങ്ങളും ഇവയുടെ ആക്രമണത്തിനിരയായിട്ടുണ്ടെന്ന് നാട്ടുകാര്‍ പറയുന്നു. പേ ബാധിച്ച നായകളും പ്രദേശത്ത് അലഞ്ഞ് തിരിയുന്നുണ്ടെന്നും നാട്ടുകാര്‍ പറഞ്ഞു.