കണ്ണൂര്‍: വരള്‍ച്ച നേരിടാന്‍ ജില്ലയില്‍ ഇതിനകം കൈക്കൊണ്ട നടപടികളെക്കുറിച്ച് മന്ത്രി കെ.കെ ശൈലജയുടെ നേതൃത്വത്തില്‍ നടന്ന വകുപ്പ് മേധാവികളുടെ യോഗം അവലോകനം ചെയ്തു. കുടിവെള്ള വിതരണത്തിനു 355 ജല കിയോസ്‌ക്കുകള്‍ ജില്ലയില്‍ നിലവിലുണ്ട്. ഇവ സ്ഥാപിക്കുന്നതിന് അനുയോജ്യമായ 838 പോയിന്റുകളുടെ പട്ടിക സര്‍ക്കാരിനു കൈമാറി. നാനൂറിലേറെ സ്ഥലങ്ങളില്‍ ഇവ സ്ഥാപിക്കുന്നതിനുള്ള സ്റ്റാന്‍ഡ് നിര്‍മിക്കുന്നതിനു നിര്‍മിതിക്കു ഭരണാനുമതി നല്‍കിക്കഴിഞ്ഞതായും യോഗം വിലയിരുത്തി. ജലവിതരണത്തിനായി ഉപയോഗിക്കുന്ന സ്വകാര്യ കിണറുകളില്‍ നിന്നുള്ള ജലത്തിന്റെ ഗുണനിലവാരം ഉറപ്പ്വരുത്തുന്നതിനു പരിശോധന പൂര്‍ത്തിയായി. ഡി.എം.ഒയുടെ നേതൃത്വത്തില്‍ ഇക്കാര്യത്തില്‍ തുടര്‍നടപടി സ്വീകരിക്കും.
താലൂക്ക് അടിസ്ഥാനത്തില്‍ വരള്‍ച്ച നേരിടുന്നതിനുള്ള പ്രവര്‍ത്തനങ്ങള്‍ ഏകോപിപ്പിക്കുന്നതിനു ഡെപ്യൂട്ടി കലക്ടര്‍മാര്‍ക്കു ചുമതല നല്‍കിയതായി കലക്ടര്‍ മീര്‍ മുഹമ്മദലി അറിയിച്ചു. ശുദ്ധജല വിതരണവുമായി ബന്ധപ്പെട്ട് വാട്ടര്‍ കിയോസ്‌ക്കുകള്‍, ടാങ്കര്‍ ലോറികള്‍ വഴിയുള്ള ജലവിതരണം തുടങ്ങിയവയെക്കുറിച്ചുള്ള വിവരങ്ങള്‍ അറിയാനുതകുന്ന പ്രത്യേക മൊബൈല്‍ ആപ്പ് ഒരാഴ്ചയ്ക്കകം തയാറാകുമെന്നും കലക്ടര്‍ പറഞ്ഞു. ജില്ലയിലെ കുടിവെള്ള പദ്ധതികള്‍ യുദ്ധകാലാടിസ്ഥാനത്തില്‍ പൂര്‍ത്തിയാക്കാന്‍ ബന്ധപ്പെട്ട ഉദ്യോഗസ്ഥര്‍ക്കു മന്ത്രി നിര്‍ദേശം നല്‍കി. ദീര്‍ഘകാല കുടിവെള്ള പദ്ധതികളില്‍ ഭാഗികമായി കമ്മിഷന്‍ ചെയ്യാനാവുന്നവ ഉടന്‍ നടത്തണം. തകരാറിലായി കിടക്കുന്ന ഹാന്‍ഡ് പമ്പുകള്‍ നന്നാക്കണം.
ജലസംരക്ഷണത്തിന്റെ ഭാഗമായി പുഴകളില്‍ സ്ഥിരം തടയണകള്‍ നിര്‍മിക്കുന്നത് അവയുടെ സ്വാഭാവികമായ ഒഴുക്കിനെ പ്രതികൂലമായി ബാധിക്കുമെന്ന് അഭിപ്രായമുയര്‍ന്ന സാഹചര്യത്തില്‍ താല്‍കാലിക തടയണകള്‍ സ്ഥാപിക്കുകയാണു ലക്ഷ്യം. മഴവെള്ള സംഭരണം, കിണര്‍ റീച്ചാര്‍ജിങ് തുടങ്ങിയ രീതികള്‍ക്കു മുന്‍ഗണന നല്‍കണം.
ഒരുമാസത്തിനകം പുതിയ കുഴല്‍ക്കിണറുകള്‍ കുഴിക്കരുതെന്നു സംസ്ഥാന സര്‍ക്കാര്‍ ഉത്തരവ് ഇറക്കിയതായും മന്ത്രി ശൈലജ പറഞ്ഞു. സണ്ണി ജോസഫ് എം.എല്‍.എ, ജില്ലാ പഞ്ചായത്ത് പ്രസിഡന്റ് കെ.വി സുമേഷ്, സബ് കലക്ടര്‍ രോഹിത് മീണ, എ.ഡി.എം ഇ മുഹമ്മദ് യൂസഫ്, വിവിധ വകുപ്പ് തലവന്‍മാര്‍ എന്നിവര്‍ പങ്കെടുത്തു.