തലശ്ശേരി : കോടിയേരി കല്ലില്‍ത്താഴെ കല്യാണ വീട്ടില്‍ അക്രമം. മൂന്ന് പേര്‍ക്ക് ഗുരുതരമായി പരുക്കേറ്റു. ഒരാളുടെ തലക്ക് വെട്ടേല്‍ക്കുകയും മറ്റ് രണ്ടു പേരെ ഇരുമ്പ് വടി കൊണ്ട് ദേഹമാസകലം അടിക്കുകയും മുഖത്ത് ഇരുമ്പ് കട്ട കൊണ്ട് ഇടിക്കുകയും ചെയ്യുകയായിരുന്നു.
കോടിയേരി കല്ലില്‍ത്താഴെയിലെ കല്ലുള്ളപറമ്പത്ത് രഗില്‍(28), അമ്പലത്താങ്കണ്ടി റിജേഷ്(25), ഇവരുടെ സുഹൃത്ത് കല്ലിത്താഴെയിലെ നസീറാ മന്‍സിലില്‍ അഫ്‌സല്‍(27)എന്നിവര്‍ക്കാണ് പരുക്കേറ്റത്. ഞായറാഴ്ച പുലര്‍ച്ചെ ഒരു മണിയോടെയാണ് സംഭവം. പരുക്കേറ്റ മൂന്ന് പേരെയും തലശ്ശേരി ഇന്ദിരാഗാന്ധി സഹകരണ ആശുപത്രിയില്‍ പ്രവേശിപ്പിച്ചു. അഫ്‌സലിന്റെ തലക്കാണ് വെട്ടേറ്റത്. മറ്റ് രണ്ട് പേര്‍ക്കും ദേഹമാസകലം ഇരുമ്പ് വടി കൊണ്ടുള്ള അടിയേറ്റ പരിക്കുണ്ട്. മുഖത്തും പരുക്കേറ്റു.
കല്ലിത്താഴെയിലെ ഒരു കല്യാണ വീട്ടില്‍ സഹായത്തിനെത്തിയതായിരുന്നു പരുക്കേറ്റ യുവാക്കള്‍. പുലര്‍ച്ചെയോടെ കല്യാണ വീട്ടിലേക്കുള്ള പൈപ്പ് ലൈനിലെ വെള്ള തീര്‍ന്നതിനെ തുടര്‍ന്ന് മോട്ടോര്‍ പ്രവര്‍ത്തിക്കാന്‍ യുവാക്കളും കല്യാണപ്പെണ്ണിന്റെ പിതാവും പോകുന്നതിനിടെയാണ് ഇവര്‍ക്ക് നേരേ അക്രമം നടന്നത്. ഉടനെ എല്ലാവരും കല്യാണ വീട്ടിലേക്ക് ഓടിക്കയറുകയായിരുന്നു. തുടര്‍ന്ന് വീട്ടിലേക്ക് ഇരച്ചെത്തിയ സംഘം അഫ്‌സലിനെ വെട്ടുകയും മറ്റുള്ളവരെ ഇരുമ്പ് വടി കൊണ്ട് അക്രമിക്കുകയായിരുന്നെന്ന് വീട്ടുകാര്‍ പറഞ്ഞു.