തളിപ്പറമ്പ്: കീഴാറ്റൂര്‍ വയലിലെ നെല്‍ കൃഷിയില്‍ നൂറു മേനി വിളവ്. ആവേശമുണര്‍ത്തിയ കൊയ്ത്തുത്സവം ജയിംസ് മാത്യു എംഎല്‍എ ഉദ്ഘാടനം ചെയ്തു. 47 പേരടങ്ങുന്ന കര്‍ഷക കൂട്ടായ്മയാണ് 65 ഏക്കറില്‍ പൊന്നുവിളയിച്ചത്. നൂറുമേനിയുടെ നിറവില്‍ നില്‍ക്കുമ്പോഴും ഈ 65 ഏക്കര്‍ പാടശേഖരം ഇല്ലാതാക്കിയാണ് നിര്‍ദ്ധിഷ്ട കുപ്പം കുറ്റിക്കോല്‍ ബൈപ്പാസ് കടന്നു പോകുകയെന്നത് കര്‍ഷകകൂട്ടായ്മയില്‍ ആശങ്കയുണര്‍ത്തുന്നു. കീഴാറ്റൂര്‍ വയലില്‍ കൊയ്ത്തുത്സവം ഉദ്ഘാടനം ചെയ്യുന്നതിനായി നാട്ടുകാരുടെയും കര്‍ഷകരുടെയും ഒന്നിച്ച് പാടത്തിറങ്ങിയ ജയിംസ് മാത്യു എം.എല്‍എ യും ആവേശത്തിലായിരുന്നു. ജ്യോതി, പുഞ്ച, ഏഴോം വിത്ത് എന്നീ ഇനങ്ങള്‍ക്കു പുറമെ നെയ്‌ച്ചോര്‍ ഉണ്ടാക്കുന്ന അരിയുടെ നെല്‍ വിത്തുമാണ് ഇവിടെ വിതച്ചിരുന്നത്്. എല്ലാ ഇനത്തിനും ഇത്തവണ നൂറുമേനിവിളവ് ലഭിച്ചുവെന്നാണ് കര്‍ഷകര്‍ പറയുന്നത്. കീഴാറ്റൂര്‍ പാടശേഖരം ഇല്ലാതാക്കി നിര്‍ദ്ധിഷ്ട കുപ്പം കുറ്റിക്കോല്‍ ബൈപ്പാസ് കടന്നു പോകുന്നതിനെതിരെ പ്രക്ഷോഭങ്ങള്‍ നടന്നുവരുമ്പോള്‍ കീഴാറ്റൂര്‍ വയലിലെ നൂറു മേനി വിളവ് അധികാരികളില്‍ തിരിച്ചറിവുണ്ടാക്കുമെന്ന പ്രതീക്ഷയിലാണ് നാട്ടുകാര്‍. ടി.വി വിനോദ് അധ്യക്ഷനായി. സി ശശീന്ദ്രന്‍, കൃഷി ഓഫിസര്‍ നാരായണന്‍ നമ്പൂതിരി, വാര്‍ഡ് കൗണ്‍സിലര്‍ പി.പ്രകാശന്‍ എന്നിവര്‍ സംസാരിച്ചു.