ന്യൂഡല്‍ഹി: മുംബൈ കോളജ് വിദ്യാര്‍ഥിനി ഇശ്‌റത്ത് ജഹാനെയും മലയാളിയായ പ്രാണേഷ് പിള്ള എന്ന ജാവേദ് ഗുലാം ശൈഖിനെയും വ്യാജ ഏറ്റുമുട്ടലില്‍ കൊലപ്പെടുത്തിയ കേസില്‍ പ്രതികള്‍ സമര്‍പ്പിച്ച ഹരജിയില്‍ വിധിപറയുന്നത് അഹമ്മദാബാദിലെ പ്രത്യേക കോടതി ഈ മാസം 21 ലേക്ക് നീട്ടി.
കേസില്‍ നിരപരാധിയാണെന്നും ഒഴിവാക്കി തരണമെന്നും ചൂണ്ടിക്കാട്ടി ഗുജറാത്ത് മുന്‍ ഡി.ജി.പി പി.പി പാണ്ഡ്യേയും ഇന്റലിജന്റ്‌സ് ബ്യൂറോയിലെ രണ്ടു ഉദ്യോഗസ്ഥരും സമര്‍പ്പിച്ച ഹരജിയാണ് കോടതി മുന്‍പാകെയുള്ളത്. തനിക്കെതിരേ തെളിവുകളില്ലെന്നും പാണ്ഡ്യേ ഹരജിയില്‍ ബോധിപ്പിച്ചിരുന്നു.
എന്നാല്‍, പാണ്ഡ്യേയുടെ ആവശ്യത്തെ എതിര്‍ത്ത് പ്രാണേഷ് പിള്ളയുടെ പിതാവ് ഗോപിനാഥ് പിള്ളയും സി.ബി.ഐയും നല്‍കിയ ഹരജിയും കോടതി മുന്‍പാകെയുണ്ട്. പാണ്ഡ്യേക്കെതിരേ ശക്തമായ തെളിവുകളുണ്ടെന്നു വാദിച്ച സി.ബി.ഐ, പാണ്ഡ്യേയുടെ ഗണ്‍മാന്റെയും പൊലിസ് ഇന്‍സ്‌പെക്ടര്‍ ബി.എച്ച് പാട്ടീലുള്‍പ്പെടെയുള്ളവരുടെ മൊഴികള്‍, ഇശ്‌റത്തും പ്രാണേഷും നിയമവിരുദ്ധ കസ്റ്റഡിയിലായിരിക്കെ ഇരുവരുമായും പാണ്ഡ്യേ കൂടിക്കാഴ്ച നടത്തിയതിന്റെ രേഖകള്‍ എന്നിവയും കോടതിയില്‍ സമര്‍പ്പിച്ചിട്ടുണ്ട്.2004 ജൂണ്‍ 15നാണ് ഇശ്‌റത്ത് ജഹാന്‍, ആലപ്പുഴ സ്വദേശി പ്രാണേഷ് പിള്ള, പാക് പൗരന്‍മാരെന്നു കരുതുന്ന ഷീഷാന്‍ ജൗഹര്‍, അംജദ് അലി റാണ എന്നിവരെ മുഖ്യമന്ത്രിയായിരുന്ന നരേന്ദ്രമോദിയെ കൊലപ്പെടുത്താനെത്തിയ ലഷ്‌ക്കര്‍ ഭീകരര്‍ എന്നാരോപിച്ച് ഗുജറാത്ത് പൊലിസ് വെടിവച്ചുകൊന്നത്.
സംഭവം നടക്കുമ്പോള്‍ ഗുജറാത്ത് ക്രൈംബ്രാഞ്ച് മേധാവിയായിരുന്നു പാണ്ഡ്യേ. കൊലപാതകം, തട്ടിക്കൊണ്ടുപോകല്‍, നിയമവിരുദ്ധമായി തടവില്‍പാര്‍പ്പിക്കല്‍, ക്രിമിനല്‍ ഗൂഢാലോചന എന്നീ കുറ്റങ്ങളാണ് പാണ്ഡ്യെക്കെതിരേയുള്ളത്.