വയനാടന്‍ കാടുകളും കാട്ടുതീ ഭീതിയില്‍
ചെമ്പ്രയിലും ബാണാസുര മലയിയും കാട്ടുതീ
കല്‍പ്പറ്റ: കഴിഞ്ഞ വെള്ളിയാഴ്ച ബന്ദിപ്പൂര്‍ വനമേഖലയില്‍ പടര്‍ന്ന്പിടിച്ച കാട്ടുതീ ശമനമില്ലാതെ തുടരുന്നു.
മൂന്നു ദിവസങ്ങളിലായുണ്ടായ അഗ്‌നിയില്‍ കരിഞ്ഞമര്‍ന്നത് നിരവധി ഹെക്ടര്‍ വനമാണ്. കാട്ടുതീ നിയന്ത്രണവിധേയമാക്കാന്‍ വനംവകുപ്പിന് കഴിയാതെ വന്നതോടെ അതിര്‍ത്തി ഗ്രാമങ്ങളായ കൊളവള്ളി, വണ്ടിക്കടവ്, ചാമപ്പാറ, ചീയമ്പം പ്രദേശങ്ങളും ഭീതിയിലാണ്. അഗ്‌നിബാധ പൂര്‍ണ്ണമായും അണക്കാനുള്ള തീവ്രശ്രമങ്ങള്‍ നടക്കുന്നുണ്ടെങ്കിലും കാട്ടുതീ പടരുകയാണ്്. ഇതോടെ വയനാട് വന്യജീവി സങ്കേതവും അതീവജാഗ്രതയിലാണ്.
ജില്ലയിലെ ഫയര്‍ഫോഴ്‌സ് യൂണിറ്റുകള്‍ സുസജ്ജമായി വനാതിര്‍ത്തികളില്‍ ക്യാമ്പ് ചെയ്യുന്നുണ്ട്. ബത്തേരിയില്‍ നിന്നും മാനന്തവാടിയില്‍ നിന്നും ഫയര്‍ഫോഴ്‌സ് യൂണിറ്റുകള്‍ അതിര്‍ത്തിയിലെത്തി. അവധിയിലുള്ള വനംവകുപ്പ് ജീവനക്കാരെ ജോലിയെടുക്കാനായി തിരികെ വിളിച്ചതായും അധികൃതര്‍ അറിയിച്ചു. കാട്ടുതീയെ തുടര്‍ന്ന് ചെമ്പ്ര പീക്ക് ഇക്കോടൂറിസം പോയിന്റ് അനിശ്ചിതകാലത്തേക്ക് അടച്ചതായി ഡി.എഫ്.ഒ അറിയിച്ചു.

[caption id="attachment_246434" align="aligncenter" width="620"] ചെമ്പ്രയില്‍ കഴിഞ്ഞദിവസം പടര്‍ന്ന കാട്ടുതീ[/caption]

വയനാട് വന്യജീവി സങ്കേതത്തോട് ചേര്‍ന്ന ബന്ദിപ്പൂര്‍ വനമേഖലക്കു പുറമെ ചെമ്പ്ര പീക്കിലും, ബാണാസുര മലയിലും അഗ്‌നിബാധയുണ്ട്. ബന്ദിപ്പുരയില്‍ തീ അണക്കുന്നതിനിടെ വനംവകുപ്പ് വാച്ചര്‍ മരിക്കുകയും റെയ്ഞ്ചര്‍ അടക്കം നിരവധി പേര്‍ക്ക് പരിക്കേല്‍ക്കുകയും ചെയ്തതോടെ തീ അണക്കാനെത്തുന്ന വനംവകുപ്പ് ഉദ്യോഗസ്ഥരും ഭീതിയിലാണ്. കര്‍ണ്ണാടക കേരള അതിര്‍ത്തി ഗ്രാമങ്ങളായ ബന്ദിപ്പൂര്‍, നാഗര്‍ഹോള വനമേഖലയില്‍ നിന്നുള്ള മുഴുവന്‍ ജീവനക്കാരും ഉന്നത വനംവകുപ്പ് ഉദ്യോഗസ്ഥരും തീ അണയ്ക്കാനുള്ള ശ്രമം നടത്തുന്നുണ്ടെങ്കിലും കനത്ത ചൂടും കാറ്റും തീ കൂടുതല്‍ മേഖലയിലേക്ക് പടര്‍ന്ന് പിടിക്കാന്‍ കാരണമാകുകയാണ്. അതിര്‍ത്തി പ്രദേശം മുഴുവന്‍ പുകപടലം കൊണ്ട് മൂടിയ സ്ഥിതിയിലാണ്. കനത്ത വെയില്‍ തീ ആളിപ്പടരാന്‍ കാരണമാകുന്നുണ്ട്. വണ്ടിക്കടവ് മുതല്‍ കൊളവള്ളി വരെയുള്ള കേരളാതിര്‍ത്തിയുലുള്ളവര്‍ക്ക് രാത്രി പോലും ഉറങ്ങാന്‍ കഴിയാത്ത അവസ്ഥയാണ്.