പരപ്പനങ്ങാടി: അന്യസംസ്ഥാന തൊഴിലാളികള്‍ക്കും വിദ്യാര്‍ഥികള്‍ക്കും മറ്റും കഞ്ചാവ് വിതരണം ചെയ്യുന്നയാള്‍ പരപ്പനങ്ങാടിയില്‍ പൊലിസ് പിടിയില്‍. റെയില്‍വേ അണ്ടര്‍ ബ്രിഡ്ജിനടിയില്‍ വച്ച് ബംഗാള്‍ സ്വദേശി നിലുപണ്ഡിറ്റി (31) നെയാണ് പരപ്പനങ്ങാടി എസ്.ഐ കെ.ജെ ജിനേഷ് അറസ്റ്റ് ചെയ്തത്.
കഞ്ചാവ് മൊത്തക്കച്ചവടക്കാരനായ ഇയാളില്‍നിന്ന് ഒന്നരകിലോ കഞ്ചാവ് ലഭിച്ചു. ആന്ധ്രാപ്രദേശ്, ഒഡിഷ തുടങ്ങിയ സ്ഥലങ്ങളില്‍നിന്നു കിലോക്കണക്കിന് കഞ്ചാവ് സംഭരിച്ച് ചില്ലറ വില്‍പനക്കാര്‍ക്ക് ഇരട്ടിവിലയ്ക്കു വില്‍ക്കുകയാണ് പതിവ്. വിദ്യാര്‍ഥികളെ ചുറ്റിപ്പറ്റി നടത്തിയ അന്വേഷണത്തിലാണ് ഇയാളെക്കറിച്ചു വിവരം ലഭിച്ചത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
താനൂര്‍ സി.ഐ അലവിയുടെ നേതൃത്വത്തില്‍ നാലു മാസത്തിനിടയില്‍ പരപ്പനങ്ങാടി താനൂര്‍ മേഖലകളില്‍നിന്നായി ഒട്ടേറെ കേസുകള്‍ പിടികൂടിയിരുന്നു.