തൃശൂര്‍: സി.പി.എം സംസ്ഥാന സമ്മേളനം ജനറല്‍ സെക്രട്ടറി സീതാറാം യെച്ചൂരി ഉദ്ഘാടനം ചെയ്യും. 22ന് രാവിലെ പത്തിന് കേരള സംഗീത നാടക അക്കാദമിയില്‍ നാലു ദിവസങ്ങളിലായി നടക്കുന്ന പ്രതിനിധി സമ്മേളനത്തിന് മുതിര്‍ന്ന നേതാവ് വി.എസ് അച്യുതാനന്ദന്‍ പതാക ഉയര്‍ത്തും. 566 പ്രതിനിധികളും സമ്മേളനത്തില്‍ പങ്കെടുക്കും.
പതാക, കൊടിമരം, ദീപശിഖാ റാലികള്‍ 21ന് തൃശൂരിലെത്തും. 21ന് വൈകിട്ട് പൊതുസമ്മേളന നഗരിയായ തേക്കിന്‍കാട് മൈതാനത്ത് മുഖ്യമന്ത്രി പിണറായി വിജയന്‍ ദീപശിഖ തെളിയിക്കും. സ്വാഗതസംഘം ചെയര്‍മാന്‍ ബേബി ജോണ്‍ പതാക ഉയര്‍ത്തും. സമാപന ദിവസമായ 25ന് ഉച്ചയ്ക്ക് രണ്ടിന് കാല്‍ലക്ഷം റെഡ് വളന്റിയര്‍മാരുടെ മാര്‍ച്ചും പൊതുസമ്മേളനവും നടക്കുമെന്ന് സംഘാടക സമിതി ചെയര്‍മാന്‍ ബേബി ജോണ്‍ വാര്‍ത്താസമ്മേളനത്തില്‍ അറിയിച്ചു.