ലണ്ടന്‍: മുന്‍ താരം അലക്‌സ് മക്‌ലീഷ് സ്‌കോട്‌ലന്‍ഡ് ഫുട്‌ബോള്‍ ടീമിന്റെ പുതിയ പരിശീലകന്‍. 2007ല്‍ ടീമിനെ കുറച്ച് കാലം പരിശീലിപ്പിച്ചതിന്റെ അനുഭവ സമ്പത്തുമായാണ് മക്‌ലീഷ് രണ്ടാം തവണയും ദേശീയ ടീമിന്റെ ചുമതലയേല്‍ക്കുന്നത്. കളിക്കുന്ന കാലത്ത് ദേശീയ ടീമിലെ സഹ താരം തന്നെയായിരുന്ന ഗോര്‍ഡന്‍ സ്ട്രചന് പകരമാണ് 59കാരനായ മക്‌ലീഷ് എത്തുന്നത്.
2007ല്‍ താത്കാലിക ചുമതലയേറ്റ കാലത്ത് സ്‌കോട്‌ലന്‍ഡ് ടീമിനെ പത്തില്‍ ഏഴ് കളികളിലും വിജയിപ്പിക്കാന്‍ സാധിച്ച പരിശീലകന്‍ കൂടിയാണ് മക്‌ലീഷ്. ഇതില്‍ ഫ്രാന്‍സിനെ അവരുടെ തട്ടകത്തില്‍ കയറി 1-0ത്തിന് അട്ടിമറിച്ചതിന്റെ നേട്ടവും ഉള്‍പ്പെടുന്നു. 2020ലെ യൂറോ കപ്പില്‍ ടീമിന് സ്ഥാനം നേടിക്കൊടുക്കുകയെന്ന വെല്ലുവിളിയാണ് മുന്‍ താരത്തെ കാത്തിരിക്കുന്നത്.