ലണ്ടന്‍: നിലവിലെ പ്രീമിയര്‍ ലീഗ് ചാംപ്യന്‍മാരായ ചെല്‍സി, മുന്‍ ചാംപ്യന്‍മാരായ ലെയ്സ്റ്റര്‍ സിറ്റി ടീമുകള്‍ ഇംഗ്ലീഷ് എഫ്.എ കപ്പ് പോരാട്ടത്തിന്റെ ക്വാര്‍ട്ടറിലേക്ക് മുന്നേറി. പ്രീ ക്വാര്‍ട്ടര്‍ പോരാട്ടത്തില്‍ ചെല്‍സി മറുപടിയില്ലാത്ത നാല് ഗോളുകള്‍ക്ക് ഹള്‍ സിറ്റിയെ വീഴ്ത്തിയപ്പോള്‍ സ്വന്തം തട്ടകത്തില്‍ 1-0ത്തിന് ഷെഫീല്‍ഡ് യുനൈറ്റഡിനെ കീഴടക്കിയാണ് ലെയ്സ്റ്റര്‍ അവസാന എട്ടിലേക്ക് കടന്നത്.
ഇരട്ട ഗോളുകളുമായി വില്ല്യന്‍ കളം നിറഞ്ഞാണ് ചെല്‍സിക്ക് സ്വന്തം മണ്ണില്‍ സുരക്ഷിത വിജയം ഒരുക്കിയത്. കളിയുടെ രണ്ട്, 32 മിനുട്ടുകളിലാണ് താരം വല ചലിപ്പിച്ചത്. ശേഷിച്ച ഗോളുകള്‍ പെഡ്രോ, ഒലിവര്‍ ജിറൂദ് എന്നിവരും വലയിലാക്കി. മത്സരത്തിലെ നാല് ഗോളുകളും ആദ്യ പകുതിയില്‍ തന്നെ ചെല്‍സി എതിരാളിയുടെ വലയില്‍ നിക്ഷേപിച്ചു. ജാമി വാര്‍ഡിയുടെ ഏക ഗോളിലാണ് ലെയ്സ്റ്ററിന്റെ വിജയം.
മറ്റ് പോരാട്ടങ്ങളില്‍ ഷെഫീല്‍ഡ് വെനസ്‌ഡേ- സ്വാന്‍സീ സിറ്റി പോരാട്ടം ഗോള്‍രഹിത സമനിലയില്‍ പിരിഞ്ഞു. ഇരു ടീമുകളും വീണ്ടും ഏറ്റുമുട്ടും. സതാംപ്ടന്‍ 2-1ന് വെസ്റ്റ് ബ്രോംവിച് ആല്‍ബിയോണിനേയും ബ്രൈറ്റന്‍ ഹോവന്‍ ആല്‍ബിയോണ്‍ 3-1ന് കവന്‍ട്രി സിറ്റിയേയും വീഴ്ത്തി അവസാന എട്ടിലേക്ക് കടന്നു.