കോഴിക്കോട്: കൊല്‍ക്കത്തന്‍ കരുത്തരെ അട്ടിമറിച്ച് വീണ്ടും ഗോകുലം കേരളാ എഫ്.സി. മോഹന്‍ ബഗാനെ അവരുടെ തട്ടകത്തില്‍ കയറി അരിഞ്ഞിട്ട ഗോകുലം മറ്റൊരു കൊല്‍ക്കത്തന്‍ വമ്പന്‍ ഈസ്റ്റ് ബംഗാളിനെ സ്വന്തം തട്ടകത്തില്‍ ഒന്നിനെതിരേ രണ്ട് ഗോളുകള്‍ക്ക് പരാജയപ്പെടുത്തി. കേരളത്തിന്റെ തുടര്‍ച്ചയായ രണ്ടാം വിജയമാണിത്. ഐ ലീഗ് ഫുട്‌ബോളിലെ കഴിഞ്ഞ മത്സരത്തില്‍ ഗോകുലം മോഹന്‍ ബഗാനെ അവരുടെ സ്റ്റേഡിയത്തില്‍ 2-1നാണ് വീഴ്ത്തിയതെങ്കില്‍ ഈസ്റ്റ് ബംഗാളിനെതിരേ സ്വന്തം തട്ടകത്തിലും 2-1ന്റെ വിജയം തന്നെയാണ് ഗോകുലം നേടിയത്.
ജയത്തോടെ പോയിന്റ് പട്ടികയില്‍ ഇന്ത്യന്‍ ആരോസിനെ പിന്തള്ളി ഗോകുലം ഏട്ടാം സ്ഥാനത്തേക്ക് കയറുകയും ചെയ്തു. 14 കളികളില്‍ നിന്ന് അഞ്ച് ജയവും ഒരു സമനിലയും എട്ട് തോല്‍വിയുമടക്കം 16 പോയിന്റാണ് ഗോകുലത്തിന്റെ സമ്പാദ്യം. ഗോകുലത്തിനോടേറ്റ അപ്രതീക്ഷിത തോല്‍വി ഈസ്റ്റ് ബംഗാളിന്റെ കിരീട മോഹങ്ങള്‍ക്ക് വലിയ തിരിച്ചടിയാണ് നല്‍കിയത്.
ആദ്യ പകുതിയില്‍ ഒരു ഗോളിന് പിന്നിട്ടുനിന്ന ഗോകുലം രണ്ടാം പകുതിയില്‍ നേടിയ രണ്ട് ഗോളുകളുടെ ബലത്തിലാണ് വിജയം പിടിച്ചെടുത്തത്. ആദ്യ പകുതിയുടെ എക്‌സ്ട്രാ ടൈമില്‍ ലഭിച്ച പെനാറ്റിയിലൂടെ കാറ്റ്‌സുമി യുസ ഈസ്റ്റ് ബംഗാളിനെ മുന്നിലെത്തിച്ചു. ഒരു ഗോളിന് പിന്നിലായ ഗോകുലം രണ്ടാം പകുതിയില്‍ നടത്തിയ മികച്ച മുന്നേറ്റങ്ങള്‍ക്കൊടുവില്‍ 51ാം മിനുട്ടില്‍ കിവി സിമോമിയിലൂടെ സമനില പിടിച്ചു.
ബോക്‌സിന് പുറത്ത് വച്ച നടന്ന കൂട്ടപൊരിച്ചിലിനിടയില്‍ ഇര്‍ഷാദ് നല്‍കിയ പന്ത് ഹെന്റി കിസിക്ക കിവിക്ക് മറിച്ചു നല്‍കി. കിവിയുടെ ഉജ്ജ്വല ഷോട്ട് ഈസ്റ്റ് ബംഗാള്‍ ഗോളിയെ മറികടന്ന് വലയില്‍ പ്രവേശിക്കുകയായിരുന്നു.
സമനില പിടിച്ചിട്ടും ഗോകുലം ആക്രമണം താഴാതെ നിലനിര്‍ത്തി ഈസ്റ്റ് ബംഗാള്‍ പോസ്റ്റിലേക്ക് മുന്നേറ്റങ്ങള്‍ നടത്തിക്കൊണ്ടിരുന്നു. 87ാം മിനുട്ടില്‍ പന്തുമായി ബോകിസിന്റെ വലതു ഭാഗത്തേക്ക് ഓടിക്കയറിയ അര്‍ജുന്‍ ജയരാജ് പന്ത് കിസിക്കയെ ലക്ഷ്യമാക്കി മറിച്ചു നല്‍കി.
പക്ഷേ ക്ലിയര്‍ ചെയ്യാന്‍ ശ്രമിച്ച ഈസ്റ്റ് ബംഗാള്‍ താരം സലാം രഞ്ചന്‍ സിങിന്റെ കാലില്‍ തട്ടി പന്ത് വലയില്‍ കയറി (2-1). അവസാന മിനുട്ടില്‍ ഗോള്‍ വീണതോടെ ഈസ്റ്റ് ബംഗാള്‍ പൊരുതി നോക്കിയെങ്കിലും ഗോകുലം പ്രതിരോധം തകര്‍ക്കാന്‍ അവര്‍ക്കായില്ല.
ഇതിനിടെ നടന്ന തര്‍ക്കത്തിനൊടുവില്‍ ഗോകുലം താരം ഇര്‍ഷാദും ഈസ്റ്റ് ബംഗാള്‍ താരം അര്‍നബും ചുവപ്പ് കാര്‍ഡ് കണ്ട് പുറത്ത് പോയതിനാല്‍ അവസാന മിനുട്ടികളില്‍ പത്ത് പേരുമായാണ് ഇരു ടീമുകളും കളിച്ചത്.
ഇന്നലെ നടന്ന രണ്ടാം മത്സരത്തില്‍ ചെന്നൈ സിറ്റി സ്വന്തം തട്ടകത്തില്‍ ചര്‍ച്ചില്‍ ബ്രദേഴ്‌സിനെ വീഴ്ത്തി. ഒന്നിനെതിരേ മൂന്ന് ഗോളുകള്‍ക്കാണ് ചെന്നൈ വിജയം സ്വന്തമാക്കിയത്.