സില്‍ഹറ്റ്: ബംഗ്ലാദേശിനെതിരായ ടി20 പരമ്പര ശ്രീലങ്കയ്ക്ക്. രണ്ട് മത്സരങ്ങളടങ്ങിയ പരമ്പര 2-0ത്തിനാണ് ലങ്ക തൂത്തുവാരിയത്. രണ്ടാം പോരാട്ടത്തില്‍ 75 റണ്‍സിനാണ് ശ്രീലങ്ക വിജയിച്ചത്. ആദ്യം ബാറ്റ് ചെയ്ത ലങ്ക നിശ്ചിത 20 ഓവറില്‍ നാല് വിക്കറ്റ് നഷ്ടത്തില്‍ 210 റണ്‍സെന്ന മികച്ച സ്‌കോര്‍ സ്വന്തമാക്കിയപ്പോള്‍ ബംഗ്ലാ ടീമിന്റെ ചെറുത്തുനില്‍പ്പ് 18.4 ഓവറില്‍ 135 റണ്‍സില്‍ അവസാനിച്ചു. നാല് പന്തുകള്‍ മാത്രം എറിഞ്ഞ് മൂന്ന് റണ്‍സ് വഴങ്ങി രണ്ട് വിക്കറ്റെടുത്ത ഗുണതിലകയും 2.1 ഓവറില്‍ രണ്ട് വിക്കറ്റെടുത്ത് മധുഷനകയും ചേര്‍ന്ന് ശ്രീലങ്കന്‍ വിജയം എളുപ്പമാക്കി. മഹമ്മദുല്ല (41), തമിം ഇഖ്ബാല്‍ (29) എന്നിവരാണ് ബംഗ്ലാ നിരയില്‍ പിടിച്ചുനിന്നവര്‍. നേരത്തെ 42 പന്തില്‍ 70 റണ്‍സെടുത്ത കുശാല്‍ മെന്‍ഡിസ്, ഗുണതിലക (42), തിസര പെരേര (31), തരംഗ (25), 11 പന്തില്‍ 30 റണ്‍സെടുത്ത ഷനക എന്നിവരുടെ ബാറ്റിങ് മികവിലാണ് ലങ്കന്‍ സ്‌കോര്‍ 200 കടന്നത്. കുശാല്‍ മെന്‍ഡിസാണ് കളിയിലേയും പരമ്പരയിലേയും താരം.