ഇംഫാല്‍: പോയിന്റ് പട്ടികയില്‍ ഒന്നാം സ്ഥാനത്തുള്ള നെരോക്കയുടെ ഐ ലീഗ് കിരീട മോഹങ്ങള്‍ തല്ലിക്കെടുത്തി എവേ പോരാട്ടത്തിലെ ത്രില്ലര്‍ മത്സരം വിജയിച്ച് കൊല്‍ക്കത്തന്‍ കരുത്തരായ മോഹന്‍ ബഗാന്‍. കഴിഞ്ഞ ദിവസം സ്വന്തം തട്ടകത്തില്‍ ഗോകുലം കേരള എഫ്.സിയോട് അട്ടിമറി തോല്‍വി നേരിട്ട് എവേ പോരാട്ടത്തിനായി നെരോക്കയുടെ തട്ടകത്തില്‍ എത്തിയ ബഗാന്‍ രണ്ടിനെതിരേ മൂന്ന് ഗോളുകള്‍ക്കാണ് വിജയം സ്വന്തമാക്കിയത്. അസര്‍ ഡിപാന്‍ഡയുടെ ഇരട്ട ഗോളുകളാണ് മുന്‍ ചാംപ്യന്‍മാര്‍ക്ക് വിജയമൊരുക്കിയത്. തോറ്റെങ്കിലും നെരോക്ക തന്നെ പോയിന്റ് പട്ടികയില്‍ ഒന്നാം സ്ഥാനത്ത്. 24 പോയിന്റുമായി മോഹന്‍ ബഗാന്‍ നാലാം സ്ഥാനത്ത്.