ന്യൂഡല്‍ഹി: വിവിധ ബാങ്കുകളില്‍ നിന്നായി എണ്ണൂറ് കോടി രൂപ വായ്പ തട്ടിപ്പു നടത്തിയ കേസില്‍ റോട്ടോമാക് പെന്‍ കമ്പനി  ഉടമ വിക്രം കോത്താരിക്കെതിരെ സി.ബി.ഐകേസ് ഫയല്‍ ചെയ്തു. സി.ബി.ഐ ഇന്നു രാവിലെ കോത്താരിയുടെ താമസസ്ഥലത്ത് റെയ്ഡ് നടത്തിയിരുന്നു. കോത്താരിയെയും അദ്ദേഹത്തിന്റെ ഭാര്യയെയും മകനേയും സി.ബി.ഐ ചോദ്യം ചെയ്തതായും റിപ്പോര്‍ട്ടുണ്ട്.

കോത്താരിയുടെ തട്ടിപ്പ് 

കഴിഞ്ഞ ദിവസമാണ് കോത്താരിയുടെ തട്ടിപ്പ് പുറത്തെത്തിയത്. അഞ്ച് ബാങ്കുകളില്‍ നിന്നായി എണ്ണൂറ് കോടിയാണ് ഇയാള്‍ വായ്പ എടുത്തിരുന്നത്. ഒരു വര്‍ഷയോ വായ്പയുടെ മുതലോ പലിശയോ അടച്ചിരുന്നില്ല.  അലഹബാദ് ബാങ്ക്, ബാങ്ക് ഓഫ് ഇന്ത്യ, ബാങ്ക് ഓഫ് ബറോഡ, ഇന്ത്യന്‍ ഓവര്‍സീസ് ബാങ്ക്, യൂനിയന്‍ ബാങ്ക് ഓഫ് ഇന്ത്യ എന്നിവയില്‍ നിന്നാണ് കോത്താരി വായ്പയെടുത്തത്.

യൂനിയന്‍ ബാങ്കില്‍നിന്ന് 485 കോടിയാണ് ഇയാള്‍ക്ക് വായ്പ അനുവദിച്ചിരുന്നത്. ശേഷിക്കുന്ന തുക മറ്റ് ബാങ്കുകളില്‍ നിന്നാണ് വായ്പയെടുത്തത്. ഒരു വര്‍ഷമായി വായ്പയുടെ തുകയോ പലിശയോ അടക്കാന്‍ തയാറാകാതിരുന്നതോടെ നടത്തിയ അന്വേഷണത്തിലാണ് വിക്രം കോത്താരിയെക്കുറിച്ച് വിവരമില്ലെന്ന് ബാങ്കുകള്‍ക്ക് അറിയാനായത്. കഴിഞ്ഞ ഒരാഴ്ചയായി കോത്താരിയുടെ കാന്‍പൂരിലെ സിറ്റി സെന്റര്‍ റോഡിലെ ഓഫിസ് അടഞ്ഞു കിടക്കുകയായിരുന്നു.

അതിനിടെ, മുങ്ങിയെന്ന വാര്‍ത്തകള്‍ പ്രചരിച്ചതോയെ താനെങ്ങോട്ടും പോവില്ലെന്നു പറഞ്ഞ് കോത്താരി രംഗത്തെത്തിയിരുന്നു. രാജ്യം കണ്ട ഏറ്റവും വലിയ ബാങ്ക് തട്ടിപ്പാണ് മുംബൈയിലെ പഞ്ചാബ് നാഷനല്‍ ബാങ്കില്‍ നടന്നത്. ഇതിന് പിന്നാലെയാണ് 800 കോടിയിലധികം രൂപയുടെ വായ്പാ തട്ടിപ്പുകൂടി റിപ്പോര്‍ട്ട് ചെയ്യപ്പെട്ടത്.

ഇന്ത്യന്‍ ബാങ്ക് അസോസിയേഷന്‍ യോഗം 

അതിനിടെ, പൊതുമേഖലാ ബാങ്കുകള്‍ കേന്ദ്രീകരിച്ച് കൂടുതല്‍ വായ്പാ തട്ടിപ്പുകള്‍ പുറത്തുവരുന്ന സാഹചര്യത്തില്‍ ഇന്ത്യന്‍ ബാങ്ക് അസോസിയേഷന്‍ യോഗം ചേര്‍ന്ന് സ്ഥിതിഗതികള്‍ വിലയിരുത്തി.പൊതുമേഖലാ-സ്വകാര്യ ബാങ്കുകളിലെ ഉന്നത ഉദ്യോഗസ്ഥര്‍ യോഗത്തില്‍ പങ്കെടുത്തു.  ദക്ഷിണ മുംബൈയിലെ  കുഫെ പരേഡിലെ ഇന്ത്യന്‍ ബാങ്ക് അസോസിയേഷന്‍ ഹാളില്‍ വിളിച്ചു ചേര്‍ത്ത യോഗം മാധ്യമങ്ങളെ ഒഴിവാക്കുന്നതിനായി  നരിമാന്‍ പോയിന്റിലെ എസ്.ബി.ഐ ആസ്ഥാനതേക്ക് മാറ്റി.

ബാങ്കിന്റെ പ്രവര്‍ത്തനത്തെ തന്നെ സാരമായി ബാധിക്കുന്ന തരത്തില്‍ തട്ടിപ്പുണ്ടായ സാഹചര്യത്തില്‍ നഷ്ടമായ പണം എങ്ങനെ തിരിച്ചുപിടിക്കുമെന്നാണ് മുഖ്യമായും ചര്‍ച്ച ചെയ്തത്. പഞ്ചാബ് നാഷനല്‍ ബാങ്കും ഇവരുടെ ജാമ്യരേഖയുടെ അടിസ്ഥാനത്തില്‍ മറ്റ് ബാങ്കുകളിലും ഉണ്ടായ തട്ടിപ്പ് വിദേശ ഇടപാടുകാരെപോലും ആശങ്കയിലാക്കിയിട്ടുണ്ട്. ഇത് ബാങ്കുകളുടെ വിശ്വാസ്യതയെ ചോദ്യം ചെയ്യുന്ന തരത്തിലേക്ക് മാറിയിട്ടുണ്ടെന്നും യോഗം വിലയിരുത്തിയിട്ടുണ്ട്.
നീരവ് മോദി തട്ടിയെടുത്ത തുകയുടെ പകുതിയെങ്കിലും അദ്ദേഹത്തിന്റെ വിവിധ സ്ഥാപനങ്ങളില്‍ റെയ്ഡ് നടത്തി പിടിച്ചെടുക്കാനായിട്ടുണ്ടെന്ന് എന്‍ഫോഴ്‌സ്‌മെന്റ് ഡയരക്ടറേറ്റ് അറിയിച്ചിട്ടുണ്ട്.