ബഗ്ദാദ്: ഇറാഖ് നഗരമായ കിര്‍കുക്കില്‍ ഐ.എസ് നടത്തിയ ആക്രമണത്തില്‍ 25 പേര്‍ കൊല്ലപ്പെട്ടു. ഇവിടെ സര്‍ക്കാര്‍ പിന്തുണയുള്ള സൈനികവ്യൂഹത്തിനു നേരെയായിരുന്നു ആക്രമണം. കൊല്ലപ്പെട്ടവര്‍ എല്ലാം സൈനികര്‍ ആണെന്നാണു വിവരം.
പൊലിസ് വേഷത്തിലെത്തിയ ഭീകരരാണ് ആക്രമണം നടത്തിയതെന്ന് ഇറാഖ് സുരക്ഷാ ഉദ്യോഗസ്ഥര്‍ അറിയിച്ചു. ആദ്യം നടന്ന ആക്രമണത്തില്‍ 10 പേരും പിന്നീട് 15 പേരും കൊല്ലപ്പെട്ടതായി കണ്ടെത്തുകയായിരുന്നു. ആക്രമണത്തിന്റെ ഉത്തരവാദിത്തം ആമാഖ് വെബ്‌സൈറ്റിലൂടെയാണ് ഐ.എസ് ഏറ്റെടുത്തത്. ഐ.എസിനെതിരേ ഇറാഖ് അന്തിമ വിജയം പ്രഖ്യാപിച്ചതിനു ശേഷവും സംഘം രാജ്യത്തുനിന്ന് ഒഴിഞ്ഞിട്ടില്ലെന്നാണു പുതിയ സംഭവം സൂചിപ്പിക്കുന്നത്.