കറാച്ചി: പാകിസ്താന്‍ മുന്‍ ക്രിക്കറ്റ് താരവും പാകിസ്താന്‍ തെഹ്‌രീകെ ഇന്‍സാഫ്(പി.ടി.ഐ) നേതാവുമായ ഇമ്രാന്‍ ഖാന്‍ വീണ്ടും വിവാഹിതനായി. തന്റെ ആത്മീയ ഉപദേശക കൂടിയായ ബുഷ്‌റ മനേകയാണ് വധു. പാകിസ്താനിലെ അറിയപ്പെട്ട 'പീര്‍'(ആത്മീയ ഉപദേശക) ആണ് ബുഷ്‌റ.
ബുഷ്‌റയുടെ വീട്ടില്‍ ലളിതമായ ചടങ്ങിലാണു വിവാഹം നടന്നത്. ഇമ്രാന്‍ ഖാന്റെ മൂന്നാമത്തെയും ബുഷ്‌റയുടെ രണ്ടാമത്തെയും വിവാഹമാണിത്. 1995ല്‍ പ്രമുഖ ബ്രിട്ടീഷ് മാധ്യമപ്രവര്‍ത്തകയും കോടിപതിയുടെ മകളുമായി ജെമിമ ഗോള്‍ഡ് സ്മിത്തിനെ വിവാഹം ചെയ്തിരുന്നു.
പിന്നീട് ഉഭയസമ്മത പ്രകാരം ഇരുവരും വേര്‍പിരിഞ്ഞു. ശേഷം ടി.വി അവതാരകയായ റെഹം ഖാനെ ജീവിതപങ്കാളിയാക്കിയെങ്കിലും ഈ ബന്ധം ഏറെകാലം നീണ്ടുനിന്നില്ല.