എരുമപ്പെട്ടി: കറങ്ങി നടക്കാന്‍ ബൈക്ക് മോഷണം നടത്തിയ 5 കുട്ടി മോഷ്ടാക്കളില്‍ നാലു പേരെ എരുമപ്പെട്ടി പൊലിസ് അറസ്റ്റ് ചെയ്തു. ബൈക്കുമായി മുങ്ങിയ മോഷണസംഘത്തിലെ ഒരാള്‍ ഒളിവില്‍. എരുമപ്പെട്ടി, മങ്ങാട് സ്വദേശികളായ എസ്.എസ്.എല്‍.സി കഴിഞ്ഞ വിദ്യാര്‍ഥികളെയാണ് എരുമപ്പെട്ടി എസ്.ഐ ഡി.ശ്രീജിത്ത്,സീനിയര്‍ പൊലിസ് ഓഫിസര്‍മാരായ കെ.പി.ജെയ്‌സണ്‍, എം.കെ.സുധാകരന്‍, മാര്‍ട്ടിന്‍, സി.പി.ഒ സജിമോന്‍ എന്നിവരുടെ നേതൃത്വത്തിലുള്ള പൊലിസ് അറസ്റ്റ് ചെയ്തത്.
കുന്നംകുളം,എരുമപ്പെട്ടി,വിയ്യൂര്‍,മുളംകുന്നത്ത്കാവ് എന്നിവിടങ്ങളില്‍ നിന്നുമാണ് ഇവര്‍ ബൈക്ക് മോഷ്ടിച്ചിട്ടുള്ളത്.കഴിഞ്ഞ ദിവസം എരുമപ്പെട്ടി സ്‌കൂള്‍ പരിസരത്തു നടത്തിയ വാഹനപരിശോധനക്കിടെ സംശയാസ്പദമായ സാഹചര്യത്തില്‍ കണ്ട വിദ്യാര്‍ഥിയെ ചോദ്യം ചെയതപ്പോഴാണ് കുട്ടി ഓടിച്ചിരുന്ന ബൈക്ക് മോഷണം നടത്തിയതാണെന്ന് അറിഞ്ഞത്.
തുടര്‍ന്ന് നടത്തിയ ചോദ്യം ചെയ്യലിനൊടുവില്‍  സംഘം ചേര്‍ന്നാണ് മോഷ്ടിച്ചതെന്നും 5പേര്‍ മോഷണ സംഘത്തിലുണ്ടെന്നും വിദ്യാര്‍ഥി മൊഴിനല്‍കി.തുടര്‍ന്ന് മേഖലയില്‍ നടത്തിയ അന്വേഷണത്തില്‍ സംഘത്തിലെ മൂന്ന് പേരെക്കൂടി ബൈക്കുകളുമായി വിവിധ സ്ഥലങ്ങളില്‍ നിന്നും പിടികൂടുകയായിരുന്നു.എന്നാല്‍ ബൈക്കുമായി മുങ്ങിയകുട്ടിമോഷണ സംഘത്തിലെ ഒരാളെ പിടികൂടാനായില്ല. ഈ കുട്ടിക്കു വേണ്ടിയുള്ള അന്വേഷണം പൊലിസ് ഊര്‍ജിതമാക്കി.