സുല്‍ത്താന്‍ ബത്തേരി: 80ാം പിറന്നാല്‍ ആഘോഷിക്കുന്ന ആനവണ്ടിക്ക് ആശംസകളുമായി ടീം കെ.എസ്.ആര്‍.ടി.സി സുല്‍ത്താന്‍ ബത്തേരിയും ആഘോഷത്തില്‍ ചേര്‍ന്നു. ബത്തേരി ഡിപ്പോ കേന്ദ്രീകരിച്ച് പ്രവര്‍ത്തിക്കുന്ന ജനകീയ കൂട്ടായ്മയാണിത്.
ചരിത്രത്തില്‍ ആദ്യമായി കെ.എസ്.ആര്‍.ടി.സി അതിന്റെ ആകെ കളക്ഷന്‍ എട്ടു കോടി അന്‍പതുലക്ഷം കടന്നപ്പോള്‍ ബത്തേരി ഡിപ്പോയും സര്‍വകാല റെക്കോര്‍ഡ് കളക്ഷന്‍ ആയ 16,67,445 രൂപ നേടി. ആഘോഷത്തില്‍ പങ്കുചേരാനായി ടീം കെ.എസ്.ആര്‍.ടി.സി സുല്‍ത്താന്‍ ബത്തേരിയുടെ നേതൃത്വത്തില്‍ ബത്തേരി യൂനിറ്റിന്റെ പ്രസ്റ്റീജ് സര്‍വീസുകളായ 07.30 പെരിക്കല്ലൂര്‍- സുല്‍ത്താന്‍ ബത്തേരി-കായംകുളം സൂപ്പര്‍ ഫാസ്റ്റ് സര്‍വീസിനും, 19.30 സുല്‍ത്താന്‍ ബത്തേരി-കോട്ടയം- തിരുവനന്തപുരം സൂപ്പര്‍ ഫാസ്റ്റ് സര്‍വീസിനുമുള്ള ലോങ്ങ് ഡെസ്റ്റിനേഷന്‍ ബോര്‍ഡുകള്‍ യൂനിറ്റ് അധികാരി സാജന്‍ വി. സ്‌കറിയ, ഡിപ്പോ എന്‍ജിനീയര്‍ പ്രശാന്ത് കൈമള്‍, അഡ്മിനിസ്‌ട്രേറ്റീവ് ഓഫിസര്‍ ചിന്റു കുര്യന്‍ എന്നിവര്‍ ഏറ്റുവാങ്ങി. ചടങ്ങില്‍ ഡിപ്പോ ജീവനക്കാര്‍, മെക്കാനിക്കല്‍ ജീവനക്കാര്‍, ടീം കെ.എസ്.ആര്‍.ടി.സി സുല്‍ത്താന്‍ ബത്തേരി അംഗങ്ങളായ മുഹമ്മദ് സലിം കുരുടന്‍കണ്ടി, ഡോണ മനു ജോസ്, അരുണ്‍ ബാബു, ശരത്ത് കൃഷ്ണനുണ്ണി പങ്കെടുത്തു.