മുംബൈ:അപൂര്‍വവും അതേസമയം അതിസങ്കീര്‍ണവുമായ ഒരു ശസ്ത്രക്രിയക്കാണ് ഇന്നലെ മുംബൈയിലെ ബ്രിഹാന്‍ മുംബൈ മുനിസിപ്പല്‍ കോര്‍പ്പറേഷന്‍ ആശുപത്രി സാക്ഷ്യം വഹിച്ചത്. ഉത്തര്‍പ്രദേശ് സ്വദേശിയായ 31 വയസുകാരനായ യുവാവിന്റെ തലച്ചോറില്‍ രൂപപ്പെട്ട ട്യൂമര്‍ നീക്കം ചെയ്താണ് ആശുപത്രി ശ്രദ്ധേയമായത്.
ലോകത്തില്‍ ഇന്നേവരെ കണ്ടെത്തിയിട്ടുള്ള ഏറ്റവും വലിയ ട്യൂമറാണ് അന്ധനായ യുവാവിന്റെ തലച്ചോറില്‍ നിന്ന് നീക്കം ചെയ്തത്. ട്യൂമറിന് 1.873 കിലോ ഭാരമുണ്ട്. ശസ്ത്രക്രിയ വിജയകരമായിരുന്നുവെന്ന് നേതൃത്വം നല്‍കിയ ഡോ. ത്രിമൂര്‍ത്തി ഡി. നദ്കര്‍ണി പറഞ്ഞു. ഉത്തര്‍പ്രദേശിലെ ഭദോഹിയിലെ പാലി ഗ്രാമവാസിയായ സന്ത്‌ലാല്‍ പാലിനെയാണ് ശസ്ത്രക്രിയക്ക് വിധേയനാക്കിയത്. തലവേദന, അന്ധത തുടങ്ങിയവകാരണമാണ് ഇയാളെ ആശുപത്രിയില്‍ പ്രവേശിപ്പിച്ചിരുന്നത്. പരിശോധനയിലാണ് കാഴ്ചക്ക് തടസമായിട്ടുള്ള ട്യൂമര്‍ കണ്ടെത്തിയത്.