ന്യൂഡല്‍ഹി: പി.എന്‍.ബിയില്‍ നിന്ന് വായ്പാ തട്ടിപ്പ് നടത്തിയ വജ്ര വ്യാപാരി നീരവ് മോദിയുടെയും മെഹുല്‍ ചോക്‌സിയുടെയും സ്ഥാപനങ്ങളില്‍ കൂട്ടപ്പിരിച്ചുവിടല്‍. 5000 പേര്‍ക്ക് ഇതിനോടകം തന്നെ പിരിച്ചുവിടുന്ന കാര്യം അറിയിച്ചുകൊണ്ടുള്ള പിങ്ക് നോട്ടിസ് നല്‍കിയതായാണ് റിപ്പോര്‍ട്ട്.

ശമ്പളം തരാന്‍ പണമില്ലെന്നും വേറെ ജോലി നോക്കിക്കോളാനും ആവശ്യപ്പെട്ട് നീരവ് മോദി ജീവനക്കാര്‍ക്ക് നേരത്തേ അറിയിപ്പ് നല്‍കിയിരുന്നു. അന്വേഷണ ഏജന്‍സികള്‍ ഓഹരികളും ബാങ്ക് അക്കൗണ്ടുകളും മരവിപ്പിച്ച സാഹചര്യത്തിലായിരുന്നു ഇത്.

അതിനിടെ സാമ്പത്തിക തട്ടിപ്പുകേസില്‍ എന്‍ഫോഴ്‌സ്‌മെന്റ് നടപടി തുടരുകയാണ്. നീരവ് മോദിയുടേയും മെഹുല്‍ ചോക്‌സിയുടേയും 94 കോടി മ്യൂച്ചല്‍ ഫണ്ട് നിക്ഷേപങ്ങള്‍ മരവിപ്പിച്ചു. ഒന്‍പത് ആഢംബര കാറുകള്‍ പിടിച്ചെടുത്തു. 141 ബാങ്ക് അക്കൗണ്ടുകള്‍ മരവിപ്പിച്ചു. സൂറത്തിലെ വജ്രവ്യാപാര സ്ഥാപനങ്ങളിലും ഗീതാഞ്ജലി ഗ്രൂപ്പ് ജ്വല്ലറികളിലും റെയ്ഡ് തുടരുകയാണ്.