കൊണ്ടോട്ടി: എയര്‍പോര്‍ട്ട് ജീവനക്കാരുടെ ശ്രദ്ധക്ക്.. പഴയ തുണിയാണ്.. ഒരുപുള്ളി ഷര്‍ട്ടുമുണ്ട്.. എടുക്കരുത്.. അമ്മ വീട്ടില്‍ കയറ്റില്ല.. കരിപ്പൂരില്‍ ലഗേജ് മോഷണത്തിനെതിരേ യാത്രക്കാരുടെ പ്രതിഷേധം ബാഗേജില്‍ തുടങ്ങി ഗാനങ്ങളില്‍വരെ നിറയുകയാണ്. കഴിഞ്ഞ തിങ്കളാഴ്ചയാണ് ദുബൈയില്‍ നിന്നെത്തിയ ആറ് യാത്രക്കാരുടെ ബാഗേജുകള്‍ കരിപ്പൂരില്‍ കൂട്ടത്തോടെ കൊള്ളയടിക്കപ്പെട്ടത്. സംഭവത്തില്‍ ദുബൈ വിമാനത്താവളത്തില്‍ പരിശോധന നടത്തിവരികയാണ്. ബാഗേജ് മോഷണത്തിനെതിരേ യാത്രക്കാര്‍ നേരിട്ടും സമൂഹമാധ്യമങ്ങളിലും കടുത്ത പ്രതിഷേധവുമായി രംഗത്തെത്തിയിട്ടുണ്ട്.
ബാഗേജില്‍ പ്രതിഷേധമെഴുതി എത്തുന്ന യാത്രക്കാരുടെ എണ്ണവും വര്‍ധിച്ചിട്ടുണ്ട്. നിരവധി ഗാനങ്ങളും ട്രോളുകളും സമൂഹമാധ്യമങ്ങളില്‍ നിറയുന്നുണ്ട്. വിലപിടിപ്പുള്ള സ്വര്‍ണാഭരണം, വാച്ച്, പണം തുടങ്ങിയവയാണ് നഷ്ടപ്പെടുന്നത്. ഗള്‍ഫിലെ വിമാനത്താവളങ്ങളില്‍ വിമാനം കയറാന്‍ നേരത്ത് വിമാനക്കമ്പനി ജീവനക്കാര്‍ വാങ്ങി സാധാരണ ലഗേജില്‍ ഇടുന്ന ബാഗുകളില്‍നിന്നാണ് മോഷണം. ബാഗേജ് മോഷണത്തിനെതിരേ പ്രവാസി സംഘടനകളും രംഗത്തെത്തിയിട്ടുണ്ട്.