ന്യൂഡല്‍ഹി: 2007ല്‍ ഗൊരഖ്പൂരില്‍ വര്‍ഗീയ കലാപത്തിന് ഇടയാക്കിയ വിദ്വേഷ പ്രസംഗം നടത്തിയ ഉത്തര്‍ പ്രദേശ് മുഖ്യമന്ത്രി യോഗി ആദിത്യ നാഥിനെതിരായ കേസില്‍ പുനരന്വേഷണം നടത്തണമെന്ന ഹരജി അലഹബാദ് ഹൈക്കോടതി തള്ളി.
വര്‍ഗീയ കലാപത്തെക്കുറിച്ച് സി.ബി.ഐ അന്വേഷണത്തിന് ശുപാര്‍ശ ചെയ്യണമെന്നാവശ്യപ്പെട്ട് പര്‍വേസ് പര്‍വാസാണ് 2008ല്‍ അലഹബാദ് ഹൈക്കോടതിയില്‍ ഹരജി നല്‍കിയത്. ഗൊരഖ്പൂരിലെ കന്റോണ്‍മെന്റ് പൊലിസ് സ്റ്റേഷനില്‍ നല്‍കിയ പരാതിയില്‍ എഫ്.ഐ.ആര്‍ രജിസ്റ്റര്‍ ചെയ്തിരുന്നു.
ആദിത്യനാഥ് ഗൊരഖ്പൂര്‍ എം.പിയായിരിക്കെയാണ് വര്‍ഗീയ പരാമര്‍ശം നടത്തിയത്. ഇതേ തുടര്‍ന്ന് സാമുദായിക സംഘര്‍ഷമുണ്ടാകുകയും ചെയ്തു. അക്രമത്തില്‍ ഒരാള്‍ കൊല്ലപ്പെട്ടിരുന്നു.
തുടര്‍ന്ന് ആദിത്യനാഥിനെ പൊലിസ് അറസ്റ്റ് ചെയ്തു. ഇതില്‍ പ്രതിഷേധിച്ച് അദ്ദേഹം നേതൃത്വം നല്‍കുന്ന ഹിന്ദു യുവ വാഹിനി പ്രവര്‍ത്തകര്‍ വ്യാപകമായി അക്രമം അഴിച്ചുവിടുകയും നിരവധി വസ്തുവകകള്‍ അഗ്നിക്കിരയാക്കുകയും ചെയ്തിരുന്നു. കേസില്‍ യോഗിക്ക് 11 മാസം ജയില്‍ ശിക്ഷ അനുഭവിക്കേണ്ടിയും വന്നിരുന്നു.