മാഡ്രിഡ്: യുവേഫ ചാംപ്യന്‍സ് ലീഗ് പ്രീ ക്വാര്‍ട്ടര്‍ പോരാട്ടത്തില്‍ കരുത്തരായ മാഞ്ചസ്റ്റര്‍ യുനൈറ്റഡിനെ സ്പാനിഷ് ടീം സെവിയ്യ സ്വന്തം തട്ടകത്തില്‍ ഗോള്‍രഹിത സമനിലയില്‍ കുരുക്കി. മറ്റൊരു മത്സരത്തില്‍ ഷാക്തര്‍ ഡൊനെട്‌സ്‌ക് ഹോം പോരാട്ടത്തില്‍ ഇറ്റാലിയന്‍ കരുത്തരായ റോമയെ 2-1ന് അട്ടിമറിച്ചു.
അല്കസിസ് സാഞ്ചസും റൊമേലു ലുകാകുവും അടക്കം വമ്പന്‍ താരങ്ങള്‍ അണിനിരന്നിട്ടും സെവിയ്യയുടെ തട്ടകത്തില്‍ മാഞ്ചസ്റ്റര്‍ യുനൈറ്റഡ് ആദ്യ പാദ പോരാട്ടം വല ചലിപ്പിക്കാതെ അവസാനിപ്പിച്ചു. മാഞ്ചസ്റ്ററിന്റെ സ്റ്റേഡിയത്തില്‍ നടക്കുന്ന രണ്ടാം പാദ പോരാട്ടം ഇരു ടീമുകള്‍ക്കും നിര്‍ണായകമായി. പന്ത് കൈവശം വയ്ക്കുന്നതിലും മറ്റും സെവിയ്യ തന്നെയായിരുന്നു മുന്നില്‍. ആക്രമണവുമായി കളം നിറഞ്ഞ അവര്‍ മികച്ച ഗോളവസരങ്ങള്‍ സൃഷ്ടിച്ചു. ഗോള്‍ പോസ്റ്റിന് കീഴില്‍ കീപ്പര്‍ ഡേവിഡ് ജിയയുടെ ചോരാത്ത കൈകളാണ് മാഞ്ചസ്റ്ററിന്റെ രക്ഷയ്‌ക്കെത്തിയത്. സെവിയ്യ താരം മുരില്‍ നേടിയ ഗോളെന്നുറച്ച ഹെഡ്ഡര്‍ നിമിഷം കൊണ്ട് തട്ടിമാറ്റി നിര്‍ണായകമായൊരു സേവ് നടത്താനും താരത്തിനായി.
കെംഗിസ് അണ്ടര്‍ നേടിയ ഗോളില്‍ ആദ്യ പകുതിയില്‍ തന്നെ മുന്നില്‍ കടന്ന റോമയെ സ്വന്തം തട്ടകത്തില്‍ രണ്ടാം പകുതിയില്‍ നേടിയ രണ്ട് ഗോളുകളുടെ ബലത്തിലാണ് ഷാക്തര്‍ അട്ടിമറിച്ചത്. റോമയുടെ തട്ടകത്തില്‍ അരങ്ങേറുന്ന രണ്ടാം ഘട്ട പോരില്‍ ഇരു ടീമുകള്‍ക്കും സാധ്യതയുണ്ട്. എവേ ഗോളിന്റെ ആനുകൂല്യം അടുത്ത തവണ സ്വന്തം മണ്ണില്‍ സമര്‍ഥമായി മുതലാക്കുകയാവും റോമ ലക്ഷ്യമിടുന്നത്.