കോഴിക്കോട്: അംഗീകാരത്തിന്റെ കാരണം ചൂണ്ടിക്കാട്ടി ന്യൂനപക്ഷ സ്‌കൂളുകള്‍ അടച്ചുപൂട്ടാനുള്ള സര്‍ക്കാര്‍ നീക്കത്തിനെതിരേ അസോസിയേഷന്‍ ഓഫ് സമസ്ത മൈനോറിറ്റി ഇന്‍സ്റ്റിറ്റിയൂഷന്‍സ് (അസ്മി) സംഘടിപ്പിക്കുന്ന സമര പ്രഖ്യാപന കണ്‍വന്‍ഷന്‍ ഇന്ന് രാവിലെ 9ന് സമസ്ത ഓഡിറ്റോറിയത്തില്‍ നടക്കും. സ്‌കൂളുകള്‍ അടച്ചൂപൂട്ടുന്നതിനെതിരേ വരുംദിവസങ്ങളില്‍ വിവിധ പ്രക്ഷോഭ പരിപാടികള്‍ അസ്മി സംഘടിപ്പിക്കും. കേരള വിദ്യാഭ്യാസ നിയമം (കെ.ഇ.ആര്‍) നിര്‍ദേശിക്കുന്ന മുഴുവന്‍ മാനദണ്ഡങ്ങളും പാലിച്ച് മികച്ച നിലവാരത്തോടെ പ്രവര്‍ത്തിക്കുന്ന അനേകം സ്‌കൂളുകളാണ് അംഗീകാരത്തിനായി കാത്തിരിക്കുന്നത്. അന്താരാഷ്ട്ര നിലവാരമുള്ള വിദ്യാഭ്യാസം നല്‍കുന്നതില്‍ അണ്‍ എയ്ഡഡ് സ്‌കൂളുകള്‍ നിര്‍ണായക പങ്കാണ് വഹിക്കുന്നത്.
അസ്മിയുടെ കീഴില്‍ രജിസ്റ്റര്‍ചെയ്ത സ്‌കൂള്‍ മാനേജ്‌മെന്റ് പ്രതിനിധികള്‍ക്ക് പുറമെ അംഗീകാരമില്ലാത്ത മറ്റ് സ്‌കൂള്‍ മാനേജ്‌മെന്റ് പ്രതിനിധികളെയും സ്‌കൂള്‍ അസോസിയേഷന്‍ പ്രതിനിധികളെയും സമര പ്രഖ്യാപന കണ്‍വന്‍ഷനിലേക്ക് ക്ഷണിച്ചിട്ടുണ്ട്. കണ്‍വന്‍ഷന്‍ എം.കെ രാഘവന്‍ എം.പി ഉദ്ഘാടനം ചെയ്യും. അസ്മി സംസ്ഥാന പ്രസിഡന്റ് പാണക്കാട് അബ്ബാസലി ശിഹാബ് തങ്ങള്‍ അധ്യക്ഷനാകും.