കൊച്ചി: ബോഡി ബില്‍ഡിങ് അസോസിയേഷന്‍ ഓഫ് കേരളയുടെ 2017-18 വര്‍ഷത്തെ മിസ്റ്റര്‍ കേരള ചാംപ്യന്‍ഷിപ്പ് ഇന്നും നാളെയുമായി കൊച്ചിയില്‍ നടക്കും. സംസ്ഥാന സ്‌പോര്‍ട്‌സ് കൗണ്‍സില്‍, സ്‌പോര്‍ട്‌സ് പ്രമോഷന്‍ കമ്പനിയായ ഈവ്‌സില്ലാസ്, മൊബൈല്‍ കമ്പനിയായ എലിഫോണ്‍ എന്നിവരുമായി സഹകരിച്ച് നടത്തുന്ന ചാംപ്യന്‍ഷിപ്പിന്റെ പ്രാഥമിക മത്സരങ്ങള്‍ ഇന്ന് വൈകിട്ട് മൂന്ന് മുതല്‍ ഒബ്‌റോണ്‍ മാളിലും ഫൈനല്‍ മത്സരങ്ങള്‍ നാളെ വൈകിട്ട് അഞ്ച് മുതല്‍ ദര്‍ബാര്‍ ഹാള്‍ ഗ്രൗണ്ടിലുമാണ് അരങ്ങേറുക. സീനിയര്‍, ജൂനിയര്‍, സബ്ജൂനിയര്‍ വിഭാഗങ്ങളിലായി 28 ഇനങ്ങളിലാണ് മത്സരം. വനിതകള്‍ക്കായി ബോഡി ഫിറ്റ്‌നസ് ചാംപ്യന്‍ഷിപ്പും അംഗപരിമിതിര്‍ക്കായി പ്രത്യേക മത്സരവും ഇതോടൊപ്പം സംഘടിപ്പിച്ചിട്ടുണ്ട്. മെന്‍സ് ബോഡി ഫിസിക്ക്, അത്‌ലറ്റിക് കാറ്റഗറിയിലും മത്സരമുണ്ടാകും. മിസ്റ്റര്‍ കേരള വിജയിക്ക് ഒരു ലക്ഷം രൂപ വിലയുള്ള ഹോണ്ട ഹോര്‍നെറ്റ് ബൈക്കാണ് സമ്മാനം. ജൂനിയര്‍, സബ്ജൂനിയര്‍ ടൈറ്റില്‍ വിജയികള്‍ക്ക് ബൈക്കുകള്‍ക്ക് പുറമെ കോയമ്പത്തൂര്‍ സി.എം.എഫ് കോളജില്‍ സൗജന്യ പ്രവേശനവും നല്‍കുമെന്ന് ബോഡി ബില്‍ഡിങ് അസോസിയേഷന്‍ ഓഫ് കേരള സെക്രട്ടറി ടി.വി പോളി അറിയിച്ചു.
ഫൈനല്‍ മത്സരങ്ങള്‍ നാളെ വൈകിട്ട് ആറിന് വിദ്യാഭ്യാസ മന്ത്രി സി രവീന്ദ്രനാഥ് ഉദ്ഘാടനം ചെയ്യും. ജില്ലാ കലക്ടര്‍ വൈ മുഹമ്മദ് സഫീറുള്ള, സിറ്റി പൊലിസ് കമ്മിഷനര്‍ എം.പി ദിനേശ് സമ്മാനദാനം നിര്‍വഹിക്കും.