റിയാദ്: അറബ് രാജ്യങ്ങളുടെ സംയുക്ത ഉച്ചകോടിക്ക് അടുത്ത മാസം റിയാദ് ആതിഥ്യമരുളും. 29-ാം അറബ് ഉച്ചകോടിയാണ് അടുത്ത മാസം 21ന് റിയാദില്‍ അരങ്ങേറുക. ഇതിനുള്ള ഒരുക്കങ്ങള്‍ നടത്തുന്നതിനുള്ള വിദേശകാര്യ മന്ത്രിമാരുടെ ഔപചാരിക ചര്‍ച്ചകള്‍ ആരംഭിച്ചു. ഉച്ചകോടിക്കു മുന്നോടിയായി വിദേശകാര്യ മന്ത്രിമാരുടെയും സാമ്പത്തിക ധനകാര്യ മന്ത്രിമാരുടെയും യോഗവും നടക്കുമെന്നു പ്രാദേശിക അറബ് മാധ്യമങ്ങള്‍ റിപ്പോര്‍ട്ട് ചെയ്തു. മേഖലയില്‍ നിലവില്‍ പുകഞ്ഞുകൊണ്ടിരിക്കുന്ന സിറിയ, ഫലസ്തീന്‍, യമന്‍ തുടങ്ങിയ സുപ്രധാന വിഷയങ്ങളായിരിക്കും ഉച്ചകോടിയില്‍ പ്രധാന ചര്‍ച്ചയാകുക. കൂടാതെ, മേഖലയിലെ ഇറാന്റെ ഇടപെടലുകളും വിഷയമാകും.
കഴിഞ്ഞ വര്‍ഷം ജോര്‍ദാനിലെ അമ്മാനില്‍ ചേര്‍ന്ന ഉച്ചകോടിയിലാണ് ഈ വര്‍ഷം മാര്‍ച്ചില്‍ സഊദിയില്‍ യോഗം ചേരാന്‍ തീരുമാനിച്ചത്. യു.എ.ഇ ഉള്‍പ്പെടെ പ്രമുഖ അംഗരാജ്യങ്ങള്‍ അഭിപ്രായപ്പെട്ടതനുസരിച്ചായിരുന്നു ഇത്. മാര്‍ച്ചില്‍ നടക്കുന്ന സാധാരണ വാര്‍ഷിക ഉച്ചകോടിയുടെ തിയതി സെക്രട്ടറിയേറ്റ് തലത്തിലാണു തീരുമാനിക്കാറുള്ളത്. പക്ഷെ, ഈജിപ്ത് തെരഞ്ഞെടുപ്പ് കൂടി പരിഗണിച്ചാണ് ഉച്ചകോടി മാര്‍ച്ച് 21ലേക്കു മാറ്റി നിശ്ചയിക്കുന്നത്. സിറിയയുടെ അംഗത്വം മരവിച്ചത് ഒഴിച്ചാല്‍ മറ്റ് അംഗരാജ്യങ്ങളെല്ലാം റിയാദ് ഉച്ചകോടിയില്‍ പങ്കെടുക്കുമെന്നാണു പ്രതീക്ഷിക്കപ്പെടുന്നത്.