റിയാദ്: കനത്ത ആക്രമണങ്ങളില്‍ ദുരിതമനുഭവിക്കുന്ന സിറിയയിലെ ഗൗഥയിലേക്ക് സഊദി അറേബ്യ അടിയന്തര സഹായം നല്‍കുന്നു. ആക്രമണം ഏറ്റവും രൂക്ഷമായ കിഴക്കന്‍ ഗൗഥയിലേക്കാണ് സഊദി കിങ് സല്‍മാന്‍ ഹ്യുമാനിറ്റേറിയന്‍ എയിഡ് ആന്‍ഡ് റിലീഫ് സെന്ററിന്റെ നേതൃത്വത്തില്‍ സഹായ വിതരണം നടത്താന്‍ ഭരണകൂടം ഉത്തരവിട്ടത്. ഭക്ഷണ കിറ്റുകളും പോഷകാഹാര കിറ്റുകളുമാണ് ഇവിടെ വിതരണം ചെയ്യുന്നതെന്നു സന്നദ്ധസംഘം വൃത്തങ്ങളെ ഉദ്ധരിച്ച് സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു.
ദൗമ, അര്‍ബിന്‍, ഹരസ്ത, മിസ്‌റബ അടക്കം ഗൗഥയിലെ വിവിധ കേന്ദ്രങ്ങളിലാണു സഹായ വിതരണം നടക്കുക. ചാരിറ്റി കിച്ചന്‍ എന്ന സംവിധാനത്തിലുള്ള സഹായവിതരണം ഏതാനും മാസങ്ങള്‍ കൂടി ഇവിടെ തുടരുമെന്നും ദിനംപ്രതി 2,000ത്തിലധികം എന്ന നിലയില്‍ ആകെ 2,00,000ത്തിലധികം ഭക്ഷണ കിറ്റുകള്‍ വിതരണം ചെയ്യുമെന്നും അധികൃതര്‍ അറിയിച്ചു.