ന്യൂഡല്‍ഹി: ഇന്ത്യന്‍ സിനിമയിലെഇതിഹാസ സ്ത്രീ സാന്നിധ്യമായ നടി ശ്രീദേവിയുടെ മരണത്തില്‍ പ്രമുഖര്‍ അനുശോചനമറിയിച്ചു. വിസ്മരിക്കാനാവാത്ത വിവിധ കഥാപാത്രങ്ങള്‍ക്ക് ജീവന്‍ നല്‍കിയ സിനിമാ രംഗത്ത് ഏറെ അനുഭവ സമ്പത്തുള്ള താരമാണ് ശ്രീദേവി. അവരുടെ കുടുംബത്തിന്റെ ദുഃഖത്തില്‍ പങ്കുചേരുന്നുവെന്ന് പ്രധാനമന്ത്രിയുടെ ഓഫിസ് ട്വീറ്റ് ചെയ്തു. കോടിക്കണക്കിന് ആരാധകരുടെ ഹൃദയം തകര്‍ത്തുകൊണ്ടാണ് ശ്രീദേവിയുടെ മരണ വാര്‍ത്ത പുറത്ത് വന്നതെന്ന് രാഷ്ട്രപതി രാംനാഥ് കോവിന്ദ് ട്വീറ്റ് ചെയ്തു.
മുന്‍ട്രാം പിറൈ, ലംഹേ, ഇംഗ്ലീഷ് വിംഗ്ലീഷ് തുടങ്ങിയ ചിത്രങ്ങളിലെ ശ്രീദേവിയുടെ അഭിനയം ഏറെ പ്രചോദകരമാണ്. ശ്രീദേവിയുടെ കുടുംബത്തിന്റെ ദുംഖത്തില്‍ പങ്കുചേരുന്നുവെന്ന് രാഷ്ട്രപതി കൂട്ടിച്ചേര്‍ത്തു. ശ്രീദേവിയുടെ മരണം ഞെട്ടിച്ചുവെന്ന് രാഹുല്‍ ഗാന്ധി ട്വീറ്റ് ചെയ്തു. അസാധ്യ അഭിനയ പാഠവമുള്ളയാളായിരുന്നു ശ്രീദേവി. കുടുംബത്തിന്റെ ദുഃഖത്തില്‍ പങ്കുചേരുന്നുവെന്ന് രാഹുല്‍ പറഞ്ഞു. അഭിനയ ലോകത്തെ ശക്തി കേന്ദ്രമായിരുന്നു ശ്രീദേവിയെന്ന് കേന്ദ്ര മന്ത്രി സ്മൃതി ഇറാനി ട്വീറ്റ് ചെയ്തു. നിരവധി വിജയങ്ങള്‍ നേടിയ അവരുടെ യാത്ര പെട്ടെന്ന് അവസാനിച്ചു.എല്ലാവിധ അനുശോചനങ്ങളും രേഖപ്പെടുത്തുവെന്ന് സ്മൃതി ഇറാനി പറഞ്ഞു. രാഷ്ട്രീയ സാമൂഹിക രംഗങ്ങളിലെ നിരവധി പേര്‍ ശ്രീദേവിയുടെ മരണത്തില്‍ അനുശോചനം അറിയിച്ചു. ബോളിവുഡ് നടനും ബന്ധുവുമായ മോഹിത് മാര്‍വയുടെ വിവാഹ സത്കാരത്തില്‍ പങ്കെടുക്കാനെത്തിയതിനിടെ ദുബൈയില്‍വച്ചാണ് ശ്രീദേവി മരിച്ചത്. ശനിയാഴ്ച രാത്രിയാണ് മരണം.