സ്വന്തം ലേഖകന്‍

തിരുവനന്തപുരം: സംസ്ഥാനത്തെ 11,764 സ്‌കൂളുകളില്‍ നിന്നായി 3.25 ലക്ഷം കുരുന്നുകള്‍ ഇന്ന് ഒന്നാം ക്ലാസിലെത്തും. കുരുന്നുകളെ വരവേല്‍ക്കാന്‍ വര്‍ണാഭമായ പ്രവേശനോത്സവമാണു വിദ്യാഭ്യാസവകുപ്പ് ഒരുക്കിയിരിക്കുന്നത്. സംസ്ഥാനതല പ്രവേശനോത്സവം തിരുവനന്തപുരം പട്ടം ഗവ. മോഡല്‍ ഹയര്‍ സെക്കന്‍ഡറി സ്‌കൂളില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. വിദ്യാഭ്യാസമന്ത്രി പ്രൊഫ. സി.രവീന്ദ്രനാഥ് അധ്യക്ഷനായിരിക്കും. ഇതുകൂടാതെ സ്‌കൂള്‍തല പ്രവേശനോത്സവവും പഞ്ചായത്ത്, ബ്ലോക്ക്തല പ്രവേശനോത്സവവും ഉണ്ടായിരിക്കും. ഒന്നു മുതല്‍ എട്ടു വരെയുള്ള കുട്ടികള്‍ക്ക് സൗജന്യ യൂനിഫോം, സൗജന്യ പാഠപുസ്തകം, നവാഗതര്‍ക്കുള്ള പ്രവേശന കിറ്റ് തുടങ്ങിയവയുടെ വിതരണോദ്ഘാടനവും ഇന്നു നടക്കും.
ഒന്നാം ക്ലാസിലെത്തുന്ന കുട്ടികളെ മുതിര്‍ന്ന കുട്ടികളും അധ്യാപകരും രക്ഷാകര്‍ത്താക്കളും ചേര്‍ന്നു പാട്ടുപാടിയും മധുരംനല്‍കിയും അക്ഷരകിരീടം അണിയിച്ചും സ്വീകരിക്കും. പിന്നണിഗായകന്‍ പി. ജയചന്ദ്രന്‍ പാടിയ സര്‍വശിക്ഷാ അഭിയാന്‍ മീഡിയാവിഭാഗം നിര്‍മിച്ച ഗാനം ആലപിച്ചാണ് മുതിര്‍ന്ന കുട്ടികള്‍ കുരുന്നുകളെ വരവേല്‍ക്കുക. ഗാനത്തിന്റെ ദൃശ്യാവിഷ്‌കാരവും ഉണ്ടായിരിക്കും. ഗ്രാമപ്രദേശങ്ങളിലെ സ്‌കൂളുകള്‍ ഈ വര്‍ഷം രാവിലെ 10 മുതല്‍ നാലു വരെയും നഗരപ്രദേശത്തെ സ്‌കൂളുകള്‍ രാവിലെ 9.30 മുതല്‍ വൈകിട്ട് 3.30 വരെയുമായിരിക്കും പ്രവര്‍ത്തിക്കുക. എട്ടു പീരിയഡായിരിക്കും ഉണ്ടാകുക. ഇന്നു മുതല്‍തന്നെ എട്ടാം ക്ലാസ് വരെയുള്ള എല്ലാ കുട്ടികള്‍ക്കും ഉച്ചഭക്ഷണം ലഭിക്കും. പാഠപുസ്തക വിതരണം പൂര്‍ണമായും ഈ മാസം തന്നെ വിതരണം ചെയ്യാനുള്ള ശ്രമത്തിലാണ് വിദ്യാഭ്യാസവകുപ്പ്. ഇനിയും 25 ശതമാനം പുസ്തകങ്ങളുടെ അച്ചടി ബാക്കിയാണ്.