ചാലിയം: കുട്ടികളുടെ കണ്ണിനും മനസിനും ചിത്രങ്ങള്‍ വരച്ച് കുളിര്‍മയേകുകയാണ് ഷരീഫ ടീച്ചര്‍. നൂറാം വര്‍ഷത്തിലേക്ക് കടക്കുന്ന ചാലിയം ഗവ.ഫിഷറീസ് എല്‍.പി സ്‌കൂളിലാണ് കുട്ടികള്‍ക്കായി ബാല ചിത്രം ഒരുക്കുന്നത്. പാഠപുസ്തകത്തിലൂടെ മനസിലാക്കിയ മൃഗങ്ങളും പക്ഷികളും കാടുകളും ചിത്രശലഭങ്ങളും പൂക്കളും കണ്‍നിറയെ കാണാന്‍ കുട്ടികള്‍ക്കായി അവസരം ഒരുക്കുകയാണ് ഷരീഫ ടീച്ചര്‍.കാലിക്കറ്റ് സ്‌കൂള്‍ ഓഫ് ഫൈന്‍ ആര്‍ട്‌സിലാണ് ഷരീഫ ചിത്രരചന പഠിക്കാനായി ചേര്‍ന്നത്.
16 വര്‍ഷമായി വിവിധ സ്‌കൂളുകളില്‍ ചിത്രരചന നടത്തുന്നു. പ്രകൃതി ദൃശ്യങ്ങളിലും മോഡലുകളിലും ചിത്രരചനകള്‍ നടത്തിയിട്ടുണ്ട്. ഛായ ചിത്ര മത്സര വേദികളില്‍ തിളങ്ങിയിട്ടുണ്ട്. കേരളോത്സവങ്ങളിലും വിവിധ ക്ലബുകള്‍ സംഘടിപ്പിക്കുന്ന മത്സരങ്ങളിലും നിരവധി സമ്മാനങ്ങള്‍ നേടിയിട്ടുണ്ട്.
ഹാജി പി. ബി. എം ഇംഗ്ലീഷ് മീഡിയം സ്‌കൂള്‍ ചാലിയം, ജി. ജി.യു.പി.എസ് ഫറോക്ക് , ശ്രീദേവി എ.യു.പി സ്‌കൂള്‍ കടലുണ്ടി , ജി.യു.പി.എസ് രാമനാട്ടുകര, ജി.എല്‍.പി.എസ് കടലുണ്ടി എന്നീ സ്‌കൂളുകളില്‍ ചിത്രങ്ങള്‍ വരയ്ക്കുകയും വര്‍ണങ്ങള്‍ നല്‍കുകയും ചെയ്തു വരുന്നു. സര്‍വശിക്ഷാ അഭിയാന്‍ സ്‌പെഷലിസ്റ്റ് അധ്യാപികയാണ്. ഷരീഫ. കെ.ടി അബൂബക്കറിന്റെയും പി.കെ കുഞ്ഞിബീവിയുടേയും മകളാണ്. ഭര്‍ത്താവ് എന്‍. പി കുഞ്ഞഹമ്മദ്. എന്‍.പി അഖില്‍, എന്‍.പി അയ്ഷ സിതാര എന്നിവര്‍ മക്കളാണ്.