ഹൈദരാബാദ്: രണ്ട് തുടര്‍ വിജയങ്ങളുടെ ആത്മവിശ്വാസവുമായി കളിക്കാനിറങ്ങിയ കേരളത്തിന്റെ വനിതാ ടീമിന് മൂന്നാം പോരാട്ടത്തില്‍ തോല്‍വി. ദക്ഷിണ മേഖലാ അണ്ടര്‍ 23 ഏകദിന ക്രിക്കറ്റ് പോരാട്ടത്തിലെ മൂന്നാം മത്സരത്തില്‍ കേരളത്തെ ആന്ധ്രാ പ്രദേശ് പരാജയപ്പെടുത്തി.
25 റണ്‍സിനാണ് ആന്ധ്രയുടെ വിജയം. ആദ്യം ബാറ്റ് ചെയ്ത ആന്ധ്ര 49.1 ഓവറില്‍ വെറും 114 റണ്‍സിന് പുറത്തായപ്പോള്‍ അതേ നാണയത്തില്‍ തിരിച്ചടിച്ച ആന്ധ്ര കേരളത്തിന്റെ ചെറുത്തുനില്‍പ്പ് 89 റണ്‍സില്‍ അവസാനിപ്പിച്ചാണ് വിജയിച്ചത്.
കേരളത്തിനായി ക്യാപ്റ്റന്‍ സജന 44 റണ്‍സെടുത്ത് പൊരുതി. അക്ഷയ 22 റണ്‍സെടുത്തു.
മറ്റൊരു താരത്തിനും രണ്ടക്കം പോലും കാണാന്‍ സാധിച്ചില്ല. നേരത്തെ നാല് വിക്കറ്റെടുത്ത കീര്‍ത്തി ജെയിംസ്, മൂന്ന് വിക്കറ്റെടുത്ത സൗരഭ്യ എന്നിവരുടെ മികച്ച ബൗളിങാണ് ആന്ധ്രയെ കുറഞ്ഞ സ്‌കോറില്‍ പുറത്താക്കുന്നതിന് കേരളത്തിന് തുണയായത്.
ഇന്ന് നടക്കുന്ന മത്സരത്തില്‍ കേരളം ഗോവയുമായി ഏറ്റുമുട്ടും.

മോണ്‍ മോര്‍ക്കല്‍ വിരമിക്കുന്നു
ജൊഹന്നാസ്ബര്‍ഗ്: ദക്ഷിണാഫ്രിക്കന്‍ പേസ് ബൗളര്‍ മോണ്‍ മോര്‍ക്കല്‍ അന്താരാഷ്ട്ര ക്രിക്കറ്റില്‍ നിന്ന് വിരമിക്കുന്നു. അടുത്ത മാസം ആരംഭിക്കുന്ന ആസ്‌ത്രേലിയന്‍ പര്യടനത്തിന് ശേഷം താരം ക്രിക്കറ്റ് മൈതാനത്തോട് വിട പറയുമെന്ന് വെളിപ്പെടുത്തി. കുടുംബത്തോടൊപ്പം കൂടുതല്‍ സമയം ചെലവഴിക്കുക ഉദ്ദേശമിട്ടാണ് 33ാം വയസില്‍ വിരമിക്കുന്നതെന്ന് താരം വ്യക്തമാക്കി. ജീവിതത്തില്‍ താന്‍ എടുത്ത കടുത്ത തീരുമാനങ്ങളിലൊന്നാണിതെന്നും മോര്‍ക്കല്‍ കൂട്ടിച്ചേര്‍ത്തു. 2006ല്‍ ഇന്ത്യക്കെതിരായ ടെസ്റ്റിലാണ് മോര്‍ക്കല്‍ അരങ്ങേറിയത്. ടെസ്റ്റില്‍ 294 വിക്കറ്റുകള്‍ നേടിയ മോര്‍ക്കല്‍ ദക്ഷിണാഫ്രിക്കയ്ക്കായി ഏറ്റവും കൂടുതല്‍ വിക്കറ്റെടുത്ത ടെസ്റ്റ് ബൗളര്‍മാരില്‍ അഞ്ചാം സ്ഥാനത്തുണ്ട്. 117 ഏകദിനങ്ങളില്‍ നിന്ന് 188 വിക്കറ്റുകളും 44 ടി20 മത്സരങ്ങളില്‍ നിന്ന് 47 വിക്കറ്റുകളും സ്വന്തമാക്കിയിട്ടുണ്ട്.