ബംഗളൂരു: കര്‍ണാടക തെരഞ്ഞെടുപ്പ് പ്രചാരണത്തില്‍ മിമിക്രി വരെ പുറത്തെടുത്താണ് ബി.ജെ.പി അധ്യക്ഷന്‍ അമിത് ഷായുടെ പ്രകടനം. രാഹുല്‍ ഗാന്ധിയെ പരിഹസിക്കുന്നതിനിടെയാണ് അദ്ദേഹം മിമിക്രി കാണിച്ചത്. ബിദറില്‍ ഒരു റാലിയെ അഭിസംബോധന ചെയ്യുകയായിരുന്നു അമിത് ഷാ.

മോദി ഭരണത്തിനെതിരെ രാഹുലുന്നയിക്കുന്ന ചോദ്യങ്ങളെയാണ് ബി.ജെ.പി അധ്യക്ഷന്‍ ഖണ്ഡിച്ചത്. നാലുവര്‍ഷംകൊണ്ട് പ്രധാനമന്ത്രി എന്തു ചെയ്‌തെന്നാണ് രാഹുല്‍ തുടര്‍ച്ചയായി ഉച്ചത്തില്‍ ചോദിച്ചുകൊണ്ടിരിക്കുന്നതെന്ന് അമിത് ഷാ പറഞ്ഞു. 'മോദിജി പറയൂ, എന്താണ് കഴിഞ്ഞ നാലുവര്‍ഷംകൊണ്ട് ചെയ്തത്' രാഹുലിന്റെ പ്രസംഗത്തെ അനുകരിച്ചുകൊണ്ട്് അമിത് ഷാ രാഹുലിനെ പരിഹസിച്ചു.


പക്ഷേ, രാഹുല്‍ ബാബ, എന്തിനാണ് നിങ്ങള്‍ ഇത്രമാത്രം ഒച്ചയുണ്ടാക്കുന്നത്? എന്തിനാണ് കഴിഞ്ഞ നാലുവര്‍ഷത്തെ കാര്യം നിങ്ങള്‍ ചോദിക്കുന്നത്? കഴിഞ്ഞ നാലു തലമുറകളായി കോണ്‍ഗ്രസ് നേതൃത്വം ഇവിടെ എന്തുചെയ്തു എന്നാണ് ഈ രാജ്യത്തെ ജനങ്ങള്‍ ചോദിക്കുന്നത് അമിത് ഷാ പറഞ്ഞു.

പരസ്പരം പരിഹസിച്ചും പഴിചാരിയുമാണ് ഇരുവരുടേയും തെരഞ്ഞെടുപ്പ് പ്രചാരണം. കടുത്ത വാക്‌പോരാട്ടമാണ് കര്‍ണാകയില്‍ നടക്കുന്നത്. രാജ്യത്തിന്റെ 'കാവല്‍ക്കാരനായി' ഭാവിക്കുന്ന അമിത് ഷാ കര്‍ണാടകത്തിലെത്തി, അഴിമതിയുടെ പേരില്‍ ജയില്‍വാസമനുഭവിച്ച ബിഎസ് യെദിയൂരപ്പയ്‌ക്കൊപ്പം അഴിമതിയ്‌ക്കെതിരായി പ്രസംഗിക്കുകയാണെന്ന് രാഹുല്‍ ഗാന്ധി പരിഹസിച്ചിരുന്നു. റഫേല്‍ ഇടപാട് സംബന്ധിച്ചും നീരവ് മോദിനടത്തിയ 11,300 കോടിയുടെ വായ്പാ തട്ടിപ്പ് സംബന്ധിച്ചും പ്രധാനമന്ത്രി പ്രതികരിക്കാത്തതിനെയും  രാഹുല്‍ ഗാന്ധി രൂക്ഷമായി വിമര്‍ശിച്ചിരുന്നു. രാജ്യത്തെ അതിസമ്പന്നരെ സഹായിക്കുകയാണ് മോദി ചെയ്യുന്നതെന്നും രാഹുല്‍ ഗാന്ധി ആരോപിച്ചിരുന്നു.




െ