ജിദ്ദ: സഊദി സൈന്യത്തിലേക്ക് ഇനി വനിതകളും അണിചേരും. സുരക്ഷയുമായി ബന്ധപ്പെട്ട തന്ത്രപ്രധാന മേഖലകളിലാണ് ഇവരെ നിയോഗിക്കുക.
ആദ്യമായാണ് സഊദിയില്‍ സൈന്യത്തിലേക്ക് സ്ത്രീകളെ റിക്രൂട്ട് ചെയ്യുന്നത്. യമന്‍ ഉള്‍പ്പെടെവിദേശ ഗള്‍ഫ് രാജ്യങ്ങളില്‍ സഊദി സൈന്യം ക്യാംപ് ചെയ്യുന്ന പശ്ചാത്തലത്തിലാണ് പുതിയ തീരുമാനം.
സ്ത്രീകള്‍ക്ക് സൈന്യത്തില്‍ ചേരാമെന്ന പ്രഖ്യാപനം നടത്തിയ സര്‍ക്കാര്‍ രജിസ്‌ട്രേഷന്‍ നടപടികള്‍ ആരംഭിക്കുകയും ചെയ്തു. സ്ത്രീകള്‍ക്ക് അപേക്ഷ സമര്‍പ്പിക്കാനുള്ള സമയം നല്‍കിയിരിക്കുന്നത് വ്യാഴാഴ്ച വരെയാണ്. അഭിമുഖവും പ്രത്യേക പരീക്ഷകളും നടത്തിയ ശേഷമാണ് നിയമനം. സഊദിക്കാരായ സ്ത്രീകളെ മാത്രമേ സൈന്യത്തിലെടുക്കൂ. വിദേശത്തുള്ള സഊദിക്കാരെ ഇപ്പോള്‍ എടുക്കില്ലെന്നാണ് സൂചന. എന്നാല്‍ ഔദ്യോഗിക ആവശ്യങ്ങള്‍ക്കായി വിദേശത്തുള്ള പിതാവിനൊപ്പം താമസിക്കുന്ന സഊദി യുവതികളെയും ജോലിക്കെടുക്കും.ഹൈസ്‌കൂള്‍ ഡിപ്ലോമയാണ് യോഗ്യത.കൂടാതെ മികച്ച ശാരീരിക ക്ഷമതയും . 25-35 വയസിനിടയിലുള്ളവരെയാണ് സൈന്യത്തിലെടുക്കുക.
നിരവധി സ്ത്രീകള്‍ സൈന്യത്തില്‍ ചേരാന്‍ താല്‍പര്യം പ്രകടിപ്പിക്കുന്നുണ്ടെന്നാണ് ബന്ധപ്പെട്ട വൃത്തങ്ങള്‍ നല്‍കുന്ന വിവരങ്ങള്‍. തൊഴിലില്ലായ്മ പരിഹരിക്കുക എന്ന ഉദ്ദേശവും ഇതിലൂടെ ഭരണകൂടത്തിനുണ്ട്.