ന്യൂഡല്‍ഹി: സി.ബി.ഐ അന്വേഷണവുമായി സഹകരിക്കില്ലെന്ന് 12,717 കോടി രൂപ പഞ്ചാബ് നാഷണല്‍ ബാങ്കില്‍ നിന്ന് വായ്പയെടുത്ത് മുങ്ങിയ നീരവ് മോദി. സി.ബി.ഐയോട് തന്നെയാണ് അദ്ദേഹം ഇക്കാര്യം വ്യക്തമാക്കിയത്.

ഇ-മെയില്‍ മുഖേനയാണ് സി.ബി.ഐ അന്വേഷണസംഘം നീരവ് മോദിയെ ബന്ധപ്പെട്ടത്. അന്വേഷണവുമായി സഹകരിക്കണം എന്നാവശ്യപ്പെട്ടായിരുന്നു മെയില്‍ അയച്ചത്. എന്നാല്‍, വിദേശത്ത് ബിസിനസ് ഉണ്ടെന്നും വരാനാവില്ലെന്നും അദ്ദേഹം മറുപടി നല്‍കിയതായി സി.ബി.ഐ ഉദ്യോഗസ്ഥര്‍ പറഞ്ഞു.

അടുത്തയാഴ്ചയ്ക്കുള്ളില്‍ അന്വേഷണവുമായി നിര്‍ബന്ധമായും സഹകരിക്കണമെന്ന് അഭ്യര്‍ഥിച്ച് വീണ്ടും മെയില്‍ ചെയ്തു. ഇപ്പോഴുള്ള രാജ്യത്തെ ഹൈക്കമ്മീഷനുമായി ബന്ധപ്പെടണമെന്നും ഇന്ത്യയിലേക്കു മടങ്ങാനുള്ള എല്ലാ സൗകര്യങ്ങളും ചെയ്തു തരാമെന്നും അറിയിച്ച് മെയില്‍ ചെയ്തു.

മോദി, അദ്ദേഹത്തിന്റെ അമ്മാവന്‍, ഗീതാജ്ഞലി ജെംസ് പ്രൊമോട്ടര്‍ മെഹുല്‍ ചോക്‌സി തുടങ്ങിയവര്‍ക്കെതിരെയാണ് വിവിധ ഏജന്‍സികള്‍ അന്വേഷണം നടത്തുന്നത്.