തിരുവനന്തപുരം: അംബേദ്കര്‍ സമഗ്രകോളനി വികസന പദ്ധതിക്ക് തെരഞ്ഞെടുക്കപ്പെടുന്നതിനുള്ള മാനദണ്ഡം നിലവിലെ 40 പട്ടിക ജാതി കുടുംബങ്ങള്‍ എന്നത് 30 ആയി കുറക്കുമെന്ന് മന്ത്രി എ.കെ. ബാലന്‍ നിയമസഭയെ അറിയിച്ചു. അടുത്ത വര്‍ഷം മുതല്‍ ഇത് പ്രാബല്യത്തില്‍ വരും. ആദിവാസി വിഭാഗങ്ങള്‍ക്കുള്ള ഭവന പദ്ധതിക്ക് ഭൂമി വാങ്ങുന്നതില്‍ ചില അനാരോഗ്യ പ്രവണതകള്‍ നിലനില്‍ക്കുന്നുണ്ട്. ഇത് പരിഹരിക്കുന്നതിന് നടപടി സ്വീകരിക്കും. ആദിവാസി ചൂണ്ടിക്കാണിക്കുന്ന ഭൂമി ഇടനിലക്കാരെ വച്ച് വാങ്ങുന്നതിന് പകരം സര്‍ക്കാര്‍ മൊത്തമായി ഭൂമി വാങ്ങി ലാന്റ് ബാങ്ക് തയാറാക്കി ഗുണഭോക്താക്കള്‍ക്ക് നല്‍കുന്ന രീതി സ്വീകരിക്കും.പട്ടികജാതി വിഭാഗങ്ങള്‍ക്ക് ഭൂമി വാങ്ങുന്നതിന് ഗ്രാമപ്രദേശങ്ങളില്‍ അഞ്ച് സെന്റിന് 3.45 ലക്ഷം രൂപയും മുന്‍സിപ്പാലിറ്റി മേഖലയില്‍ മൂന്ന് സെന്റിന് 4.5ലക്ഷം രൂപം കോര്‍പറേഷന്‍ പരിധിയില്‍ മൂന്ന് സെന്റിന് 6 ലക്ഷം രൂപയും അനുവദിക്കും.
ഇടത് സര്‍ക്കാര്‍ അധികാരത്തില്‍വന്നശേഷം പട്ടികജാതി പട്ടിക വര്‍ഗ വിഭാഗങ്ങള്‍ക്കെതിരേയുള്ള അതിക്രമങ്ങളുമായി ബന്ധപ്പെട്ട് 2,111 കേസുകള്‍ രജിസ്റ്റര്‍ ചെയ്തിട്ടുണ്ട്. ഇതില്‍ രണ്ട് കേസുകളില്‍ മാത്രമാണ് പ്രതികള്‍ ശിക്ഷിക്കപ്പെട്ടിട്ടുള്ളതെന്ന് മന്ത്രി അറിയിച്ചു. എസ്.സി വിഭാഗങ്ങള്‍ക്കെതിരേയുള്ള അതിക്രമങ്ങളുമായി ബന്ധപ്പെട്ട് 1776കേസുകളും എസ്.ടി വിഭാഗങ്ങള്‍ക്കെതിരേയുള്ള അതിക്രമങ്ങളുമായി ബന്ധപ്പെട്ട് 335 കേസുകളുമാണ് രജിസ്റ്റര്‍ ചെയ്തിട്ടുള്ളതെന്നും മന്ത്രി പറഞ്ഞു.