ചെന്നൈ: ഐ.എന്‍.എക്‌സ് മീഡിയ പണമിടപാട് കേസുമായി ബന്ധപ്പെട്ട് കോണ്‍ഗ്രസ് നേതാവും മുന്‍ കേന്ദ്ര ധനകാര്യ മന്ത്രിയുമായ പി. ചിദംബരത്തിന്റെ മകന്‍ കാര്‍ത്തി ചിദംബരത്തെ സി.ബി.ഐ അറസ്റ്റ് ചെയ്തു. വിദേശ യാത്ര കഴിഞ്ഞ് ചെന്നൈ വിമാനത്താവളത്തില്‍ എത്തിയ അദ്ദേഹത്തെ ഇന്നലെ രാവിലെയായിരുന്നു സി.ബി.ഐ അറസ്റ്റ് ചെയ്തത്. ഐ.എന്‍.എക്‌സ് മീഡിയ പണമിടപാടുമായി ബന്ധപ്പെട്ട് വ്യക്തമായ തെളിവുകള്‍ ലഭിച്ച സാഹചര്യത്തിലാണ് അറസ്റ്റ് ചെയ്തതെന്ന് സി.ബി.ഐ അറിയിച്ചു. ഇക്കഴിഞ്ഞ 16ന് അദ്ദേഹത്തിന്റെ അക്കൗണ്ടന്റിനെ ഡല്‍ഹിയില്‍ വച്ച് എന്‍ഫോഴ്‌സ്‌മെന്റ് ഡയരക്ടറേറ്റ് അറസ്റ്റ് ചെയ്തിരുന്നു.
അറസ്റ്റ് രാഷ്ട്രീയ തലത്തിലും വലിയ വിവാദങ്ങള്‍ക്ക് വഴിവച്ചിട്ടുണ്ട്. അഴിമതിയും ദുര്‍ഭരണവും മറച്ചുവക്കാനുള്ള മോദി സര്‍ക്കാരിന്റെ നീക്കത്തിന്റെ ഭാഗമായാണ് അറസ്റ്റെന്ന് കോണ്‍ഗ്രസ് വക്താവ് രണ്‍ദീപ് സുര്‍ജേവാല ആരോപിച്ചു.