കാബൂള്‍: താലിബാനുമായുള്ള ബന്ധത്തില്‍ നിര്‍ണായകമായ മാറ്റവുമായി അഫ്ഗാന്‍. ഉപാധിയില്ലാത്ത ചര്‍ച്ചക്ക് താലിബാനുമായി തയാറാണെന്നും രാജ്യത്ത് അംഗീകൃത രാഷ്ട്രീയ പാര്‍ട്ടിയായി താലിബാനെ അംഗീകരിക്കാമെന്ന് അഫ്ഗാന്‍ പ്രസിഡന്റ് അഷ്‌റഫ് ഗനി പറഞ്ഞു.
16 വര്‍ഷമായി അഫ്ഗാനില്‍ തുടരുന്ന ആക്രമണങ്ങള്‍ അവസാനിപ്പിക്കാന്‍ ചര്‍ച്ചയിലൂടെ സാധ്യമാവുമെന്ന് അഷ്‌റഫ് ഗനി പറഞ്ഞു. കാബൂളില്‍ ഇന്നലെ നടന്ന അന്താരാഷ്ട്ര കോണ്‍ഫറന്‍സിലാണ് അദ്ദേഹം ഇക്കാര്യം പറഞ്ഞത്. അഫ്ഗാന്‍ പുരോഗതിക്കായി സംഘടിപ്പിച്ച യോഗത്തില്‍ 25 ഓളം രാഷ്ട്ര പ്രതിനിധികള്‍ പങ്കെടുത്തു.
താലിബാനുമായുള്ള ചര്‍ച്ചയുടെ പുരോഗതിയനുസരിച്ച് ഭരണഘടനാ പുന:പരിശോധനക്ക് തയാറാണെന്ന് അഷ്‌റഫ് ഗനി പറഞ്ഞു. മേഖലയില്‍ അക്രമങ്ങള്‍ അവസാനിപ്പിക്കണമെന്നും ജയിലിലുള്ളവരെ വിട്ടയക്കാന്‍ തയാറാണെന്നും കരിമ്പട്ടികയില്‍ പേരുള്ള താലിബാന്‍ നേതാക്കളെ പട്ടികിയില്‍ നിന്ന് നീക്കാമെന്നും അഷ്‌റഫ് ഗനി വാഗ്ദാനം ചെയ്തു.
അഫ്ഗാന്‍ സര്‍ക്കാരിനെ താലിബാന്‍ അംഗീകരിക്കണം രാജ്യത്തെ നീതി നിയമ സംവിധാനങ്ങള്‍ പൂര്‍ണമായും പാലിക്കണമെന്നും ചര്‍ച്ചകള്‍ക്കായി കാബൂളിലെ ഇതര പ്രദേശങ്ങളില്‍ ഓഫിസുകള്‍ സ്ഥാപിക്കണമെന്നും അഷ്‌റഫ് ഗനി കൂട്ടിച്ചേര്‍ത്തു. അഫ്ഗാനുമായി നേരിട്ടുള്ള ചര്‍ച്ചക്ക് തയാറല്ലെന്ന നിലപാടാണ് താലിബാനുള്ളത്.
കൂടാതെ യു.എസുമായി നേരിട്ട് ചര്‍ച്ചക്ക് തയാറാണെന്ന് താലിബാന്‍ കഴിഞ്ഞ ദിവസം പറഞ്ഞിരുന്നു. എന്നാല്‍ താലിബാനുമായി അഫ്ഗാന്‍ വര്‍ഷങ്ങളായി തുടരുന്ന നയങ്ങളില്‍ നിന്നുള്ള നിര്‍ണായകമായ മാറ്റമാണിത്. താലിബാനെ തീവ്രവാദികള്‍, വിമതര്‍ ഇങ്ങനെയാണ് അഫ്ഗാന്‍ സര്‍ക്കാര്‍ ഇതുവരെ വിളിച്ചിരുന്നത്.
2001ല്‍ അഫ്ഗാനില്‍ അധികാരം നഷ്ടപ്പെട്ടത് മുതല്‍ രാജ്യം തിരിച്ചുപിടിക്കാനുള്ള ശ്രമത്തിലാണ് താലിബാന്‍. യു.എസ് സൈന്യം അഫ്ഗാന്‍ വിടണമെന്നാണ് താലിബാന്റെ ആവശ്യം.