ന്യൂഡല്‍ഹി: ഈ വര്‍ഷം അവസാനം ഭുവനേശ്വറില്‍ അരങ്ങേറുന്ന ഹോക്കി ലോകകപ്പ് പോരാട്ടത്തിന്റെ സമയ ക്രമവും ടീമുകളുടെ ഗ്രൂപ്പ് നിര്‍ണയവും പൂര്‍ത്തിയാക്കി.
16 ടീമുകള്‍ മാറ്റുരയ്ക്കുന്ന ലോക പോരാട്ടത്തില്‍ നാല് വീതം ടീമുകളെ നാല് ഗ്രൂപ്പുകളാക്കി തിരിച്ചാണ് മത്സരം. ആതിഥേയരായ ഇന്ത്യ കരുത്തരായ ബെല്‍ജിയം, കാനഡ, ദക്ഷിണാഫ്രിക്ക ടീമുകള്‍ക്കൊപ്പം പൂള്‍ സിയിലാണ് മാറ്റുരയ്ക്കുന്നത്. നിലവിലെ ഒളിംപിക് ചാംപ്യന്മാരും ലോക രണ്ടാം റാങ്കുകാരുമായ അര്‍ജന്റീന പൂള്‍ എയില്‍ ന്യൂസിലന്‍ഡ്, സ്‌പെയിന്‍, ഫ്രാന്‍സ് ടീമുകള്‍ക്കൊപ്പമാണ്. നിലവിലെ ഒന്നാം സ്ഥാനക്കാരും ലോക ചാംപ്യന്‍മാരുമായ ആസ്‌ത്രേലിയ പൂള്‍ ബിയില്‍ ഇംഗ്ലണ്ട്, അയര്‍ലന്‍ഡ്, ചൈന ടീമുകള്‍ക്കെതിരായാണ് പ്രാഥമിക റൗണ്ടില്‍ പോരാടുക. പൂള്‍ ഡിയില്‍ ഹോളണ്ട്, ജര്‍മനി, മലേഷ്യ, പാകിസ്താന്‍ ടീമുകളാണ് ഉള്‍പ്പെട്ടിട്ടുള്ളത്.
ഭുവനേശ്വറിലെ കലിംഗ സ്റ്റേഡിയത്തില്‍ നവംബര്‍ 28 മുതല്‍ ഡിസംബര്‍ 16 വരെയാണ് ലോക പോരാട്ടങ്ങള്‍. പ്രാഥമിക റൗണ്ടില്‍ വൈകിട്ട് അഞ്ചിനും ഏഴിനുമാണ് മത്സരങ്ങള്‍ നടക്കുക. 16,000ത്തോളം കാണികള്‍ക്ക് മത്സരം വീക്ഷിക്കാനുള്ള പാകത്തിലാണ് സ്റ്റേഡിയം ക്രമീകരിച്ചിരിക്കുന്നത്.