ന്യൂഡല്‍ഹി: ലോക പോരാട്ടത്തില്‍ മെഡല്‍ നേടിയ ഗൗരവ് ബിധുരി, ശിവ ഥാപ എന്നിവരെ ഒഴിവാക്കി കോമണ്‍വെല്‍ത്ത് ഗെയിംസിനുള്ള ഇന്ത്യന്‍ ബോക്‌സിങ് ടീമിനെ പ്രഖ്യാപിച്ചു. വെറ്ററന്‍ വനിതാ താരം മേരി കോം, വികാസ് കൃഷ്ണന്‍, മനിഷ് കൗശിക്, അമിത് ഫംഗല്‍, മുഹമ്മദ് ഹസ്സമുദ്ദീന്‍, മനോജ് കുമാര്‍, സതിഷ് കുമാര്‍, ലോവ്‌ലിന ബോര്‍ഗോഹിന്‍, സരിതാ ദേവി എന്നിവരാണ് നിലവില്‍ ടീമില്‍ ഇടം പിടിച്ചവര്‍.
പരമ്പരാഗതമായി നടത്താറുള്ള യോഗ്യതാ പോരാട്ടങ്ങള്‍ ഒഴിവാക്കിയാണ് ഇത്തവണ ടീമിനെ തിരഞ്ഞെടുത്തത്. കഴിഞ്ഞ വര്‍ഷം അരങ്ങേറിയ ദേശീയ പോരാട്ടത്തിലെ മികവിന്റെ അടിസ്ഥാനത്തിലാണ് ടീം തിരഞ്ഞെടുപ്പ്. അതേസമയം ഇന്ന് മുതല്‍ ഈ മാസം നാല് വരെ 91, 52 കിലോ വിഭാഗത്തില്‍ മത്സരിക്കുന്ന താരങ്ങള്‍ക്കായി യോഗ്യതാ പോരാട്ടം നടത്തും.
നാളെ മുതല്‍ കസാഖിസ്ഥാനില്‍ അരങ്ങേറുന്ന ചാംപ്യന്‍ഷിപ്പിലെ പ്രകടനത്തിന്റെ അടിസ്ഥാനത്തില്‍ വനിതാ താരം സര്‍ജുബാല ദേവിയെ 51 കിലോ വിഭാഗത്തില്‍ കോമണ്‍വെല്‍ത്ത് ഗെയിംസിന് അയക്കാനും തീരുമാനമായിട്ടുണ്ട്.