കൊച്ചി: ആപ്പിള്‍ എ ഡേ പ്രോപ്പര്‍ട്ടീസ് കമ്പനിയുടെ റിയല്‍ എസ്റ്റേറ്റ് തട്ടിപ്പിനിരയായവര്‍ വീണ്ടും സമരരംഗത്തേക്ക്. കെല്‍സ ഇടപെട്ട് പ്രശ്‌നപരിഹാരം ഉണ്ടാക്കിയെന്ന് ബോധപൂര്‍വം പൊതുസമൂഹത്തെ വിശ്വസിപ്പിക്കുകയായിരുന്നു ആപ്പിള്‍ പ്രോപ്പര്‍ട്ടീസ് ഉടമകളായ സാജു കടവിലാന്‍, രാജീവ് ചെറുവാര എന്നിവരെന്ന് തട്ടിപ്പിനിരയായവര്‍ കൊച്ചിയില്‍ വാര്‍ത്താസമ്മേളനത്തില്‍ ആരോപിച്ചു. ഇതു സംബന്ധിച്ച് കോടതി നടപടികള്‍ അനന്തമായി നീളുന്നതില്‍ ആശങ്കയുണ്ടെന്നും അവര്‍ പറഞ്ഞു. നഷ്ടപ്പെട്ട ഒരു രൂപ പോലും തിരികെ ലഭിച്ചിട്ടില്ല. നിയമ നടപടികള്‍ നീളുന്നതിനാല്‍ പ്രതീക്ഷ നഷ്ടപ്പെട്ട നിക്ഷേപകരില്‍ പലരും ആത്മഹത്യ ചെയ്തു. ആയിരക്കണക്കിന് ആളുകളെ കബളിപ്പിച്ച് 150 കോടിയിലേറെ തട്ടിയെടുത്ത ആപ്പിള്‍ ഉടമകള്‍ ഇപ്പോഴും സുഖസൗകര്യങ്ങളോടെ രാജകീയമായി കഴിയുകയാണെന്ന് ആപ്പിള്‍ പ്രൊജക്ട്‌സ് ഇന്‍വെസ്റ്റേഴ്‌സ് അസോസിയേഷന്‍സ് ആന്‍ഡ് കണ്‍സോഷ്യം ആരോപിച്ചു.

കോടികള്‍ തട്ടിയെടുത്ത കേസ് കെല്‍സ ഏറ്റെടുക്കാനുണ്ടായ കാരണം ദുരൂഹത നിറഞ്ഞതാണ്. തട്ടിപ്പിനിരയായവര്‍ക്ക് നീതി നല്‍കാനെത്തിയ കെല്‍സയുടെ മധ്യസ്ഥശ്രമങ്ങള്‍ നിയമ നടപടികള്‍ വൈകിപ്പിക്കാന്‍ മാത്രമാണ് ഇടയാക്കിയത്. കെല്‍സ മുന്‍പാകെ ആപ്പിള്‍ ഉടമകള്‍ നല്‍കിയ ഉറപ്പുകള്‍ ഒന്നും പാലിച്ചിട്ടില്ല. കെല്‍സയുടെ തുടര്‍ന്നുള്ള ഇടപെടല്‍ കാരണം നിക്ഷേപകര്‍ക്ക് വീണ്ടും രണ്ടര വര്‍ഷം കൂടി നഷ്ടമായി. ആപ്പിള്‍ ഉടമകളുമായി ഒപ്പിട്ട ധാരണാപത്രം പോലും പാലിക്കാന്‍ തയാറാകാതെ വന്നതോടെയാണ് വീണ്ടും കോടതിയെ സമീപിക്കാന്‍ നിക്ഷേപകര്‍ നിര്‍ബന്ധിതരായത്.

2011 ജൂലൈയില്‍ തുടങ്ങിയ നിയമനടപടികള്‍ അനന്തമായി നീളുകയാണ്. കോടിക്കണക്കിന് രൂപ സ്വന്തമാക്കി ആര്‍ഭാട ജീവിതം നയിക്കുന്ന ആപ്പിള്‍ ഉടമകളുടെ സ്വത്തുവകകള്‍ കണ്ടെത്തി പിടിച്ചെടുക്കാനുള്ള ശ്രമം പോലും കെല്‍സ അഡ്മിനിസ്‌ട്രേറ്റര്‍ നടത്തിയിട്ടില്ല. ഹൈക്കോടതി നിയോഗിച്ച അഡ്മിനിസ്‌ട്രേറ്റര്‍ ആപ്പിള്‍ ഉടമകളുടെ പിണിയാളായി പ്രവര്‍ത്തിക്കുകയാണെന്നും ഇക്കാര്യം കോടതിയുടെ ശ്രദ്ധയില്‍ കൊണ്ടുവരുമെന്നും അവര്‍ പറഞ്ഞു. പ്രശ്‌നം പരിഹരിക്കുന്നതിലല്ല, ഇതു പരമാവധി വൈകിപ്പിക്കാനാണ് അഡ്മിനിസ്‌ട്രേറ്റര്‍ ശ്രമിക്കുന്നത്. കോടതി വിധികള്‍ പാലിക്കാന്‍ പോലും അഡ്മിനിസ്‌ട്രേറ്റര്‍ തയാറാകുന്നില്ല. 2016 നവംബര്‍ മൂന്നിലെ കോടതി ഉത്തരവ് പ്രകാരം ആറ് ആഴ്ചയ്ക്കകം പ്ലോട്ടുകളുടെ രജിസ്‌ട്രേഷന്‍ നടത്തണമെന്ന ഉത്തരവ് 15 മാസം കഴിഞ്ഞിട്ടും നടപ്പാക്കാന്‍ അഡ്മിനിസ്‌ട്രേറ്റര്‍ ഒരുക്കമല്ല.

ആപ്പിള്‍ എ ഡേ പ്രോപ്പര്‍ട്ടീസിന്റെ വസ്തുവകകള്‍ വാങ്ങാനെന്ന വ്യാജേന ഫോര്‍ട്ടിന്‍ ഹോള്‍ഡേഴ്‌സ് എന്ന കടലാസ് കമ്പനിയെ കൊണ്ടുവരികയും അതിന്റെ പേരില്‍ കോടതിയെ തെറ്റിദ്ധരിപ്പിച്ച് രണ്ടുവര്‍ഷത്തോളം നിയമ നടപടികള്‍ വൈകിച്ചത് എന്തിനെന്ന് അഡ്മിനിസ്‌ട്രേറ്റര്‍ വ്യക്തമാക്കണമെന്നും തട്ടിപ്പിനിരയായവര്‍ ആവശ്യപ്പെട്ടു. കൊച്ചി നഗരത്തിന്റെ വിവിധ ഭാഗങ്ങളില്‍ ആപ്പിള്‍ എ ഡേ പ്രോപ്പര്‍ട്ടീസ് പ്രഖ്യാപിച്ച ആപ്പിള്‍ ഐസ്, ബിഗ് ആപ്പിള്‍, ആപ്പിള്‍ സ്യൂട്ട്, ആപ്പിള്‍ ന്യൂ കൊച്ചിന്‍ തുടങ്ങിയ പാര്‍പ്പിട പദ്ധതികള്‍ക്കു വേണ്ടി ഒരു ലക്ഷം രൂപ മുതല്‍ 40 ലക്ഷം രൂപ വരെയാണ് ഇവര്‍ ഇടപാടുകാരില്‍ നിന്ന് കൈപ്പറ്റിയത്. ഇവയില്‍ ചില പദ്ധതികള്‍ പാതി വഴിയില്‍ മുടങ്ങിയപ്പോള്‍ മറ്റുള്ളവ കടലാസിലൊതുങ്ങിയെന്നും ആപ്പിള്‍ പ്രൊജക്ട്‌സ് ഇന്‍വെസ്റ്റേഴ്‌സ് അസോസിയേഷന്‍സ് ആന്‍ഡ് കണ്‍സോഷ്യം പ്രതിനിധികളായ പി.കെ പിള്ള, ജോയ് കെ പൗലോസ്, മാത്യു ജോസഫ്, സോമനാഥന്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു.