തൃശൂര്‍: പ്രായപൂര്‍ത്തിയാവാത്ത പട്ടികജാതിയില്‍പ്പെട്ട പെണ്‍കുട്ടിയെ ബലാത്സംഗം ചെയ്യാന്‍ ശ്രമിക്കുകയും പ്രകൃതിവിരുദ്ധ ലൈംഗികപീഡനത്തിന് ഇരയാക്കുകയും ചെയ്ത കേസില്‍ രണ്ട് പ്രതികള്‍ക്ക് 21 വര്‍ഷം കഠിനതടവും ഒരു ലക്ഷം രൂപ പിഴയും വിധിച്ചു.
കടപ്പുറം വില്ലേജ് കോട്ടപ്പടി തെക്കന്‍വീട്ടില്‍ മുഹമ്മദ് ഫാറൂഖ്, രണ്ടാം പ്രതി മണത്തല ചാലില്‍ വീട്ടില്‍ ഹനീഫ എന്നിവരെയാണ് തൃശൂര്‍ ജില്ലാ പ്രിന്‍സിപ്പല്‍ സെഷന്‍സ് ജഡ്ജി എ ബദറുദ്ദീന്‍ ശിക്ഷിച്ചത്. മൂന്നാം പ്രതിയായ നിയാസ് ജാമ്യം എടുത്തതിനു ശേഷം ഒളിവില്‍ പോയതിനാല്‍ വിചാരണ നേരിട്ടിട്ടില്ല.
2006 ഡിസംബര്‍ 31ന് ആറ് മണിക്കാണ് കേസിനാസ്പദമായ സംഭവം.
16 വയസുള്ള പെണ്‍കുട്ടിയെ പ്രതികള്‍ സ്വാധീനിച്ച് വിളിച്ചുകൊണ്ടുപോയി ഹനീഫയുടെ വീട്ടിലെത്തിച്ച് ബലാത്സംഗം ചെയ്യാന്‍ ശ്രമിക്കുകയും പിന്നീട് പ്രകൃതിവിരുദ്ധ പീഡനത്തിന് ഇരയാക്കുകയും ചെയ്തുവെന്നാണ് പ്രോസിക്യൂഷന്‍ കേസ്.
വളരെ ഗൗരവമുള്ള കുറ്റകൃത്യമാണ് പ്രതികള്‍ ചെയ്തതെന്നും ഇവര്‍ യാതൊരു വിധ ദയയും അര്‍ഹിക്കുന്നില്ലെന്നുമുള്ള പബ്ലിക്ക് പ്രോസിക്യൂട്ടര്‍ അഡ്വ. കെ.ഡി ബാബുവിന്റെ വാദം അംഗീകരിച്ചാണ് കോടതി പ്രതികള്‍ക്ക് ശിക്ഷ വിധിച്ചത്.
പ്രായപൂര്‍ത്തിയാകാത്ത പെണ്‍കുട്ടിയെ സ്വാധീനിച്ച് ലൈംഗികപീഡനം നടത്തുന്നതിനു വേണ്ടി തട്ടിക്കൊണ്ടു പോയതിന് ഏഴ് വര്‍ഷം കഠിനതടവും 50,000 രൂപ പിഴയും, ബലാത്സംഗം ചെയ്യാന്‍ ശ്രമിച്ചതിന് ഏഴ് വര്‍ഷം കഠിനതടവും പ്രകൃതിവിരുദ്ധപീഡനത്തിന് ഏഴ് വര്‍ഷം കഠിനതടവും, 50,000 രൂപ പിഴയും അടക്കം ആകെ 21 വര്‍ഷം കഠിനതടവും ഒരു ലക്ഷം രൂപ പിഴയുമാണ് ശിക്ഷ വിധിച്ചത്.
ശിക്ഷ ഒന്നിച്ച് അനുഭവിച്ചാല്‍ മതി. പിഴസംഖ്യ അടച്ചാല്‍ അത് ഇരയ്ക്ക് നല്‍കണം. പിഴ അടയ്ക്കാത്ത പക്ഷം 8 മാസം കൂടി തടവുശിക്ഷ അനുഭവിക്കണമെന്നും വിധിയിലുണ്ട്.