ഹൈദരാബാദ്: അണ്ടര്‍ 23 ദക്ഷിണ മേഖലാ ദേശീയ വനിതാ ക്രിക്കറ്റ് പോരാട്ടത്തില്‍ കേരളത്തിന് വിജയം. കര്‍ണാടകയെ 81 റണ്‍സിന് പരാജയപ്പെടുത്തിയാണ് കേരളം അഞ്ച് കളികളില്‍ നാലാം വിജയം സ്വന്തമാക്കിയത്. ആദ്യം ബാറ്റ് ചെയ്ത കേരളം നിശ്ചിത 50 ഓവറില്‍ ഒന്‍പത് വിക്കറ്റ് നഷ്ടത്തില്‍ 157 റണ്‍സെടുത്തപ്പോള്‍ കര്‍ണാടകയുടെ പോരാട്ടം 29.2 ഓവറില്‍ 76 റണ്‍സില്‍ അവസാനിപ്പിച്ചാണ് കേരളം വിജയം ആഘോഷിച്ചത്.
എട്ടോവറില്‍ 12 റണ്‍സ് മാത്രം വഴങ്ങി മൂന്ന് മെയ്ഡന്‍ ഓവര്‍ ഉള്‍പ്പെടെ അഞ്ച് വിക്കറ്റുകള്‍ പിഴുത മിന്നു മണിയുടെ മാരക ബൗളിങാണ് കേരളത്തിന് വിജയമൊരുക്കിയത്. മൂന്ന് വിക്കറ്റ് വീഴ്ത്തി കീര്‍ത്തി ജെയിംസും രണ്ട് വിക്കറ്റെടുത്ത് ജിപ്‌സ ജോസഫും മിന്നുവിന് പിന്തുണ നല്‍കി. 20 റണ്‍സെടുത്ത പ്രത്യുഷയാണ് കര്‍ണാടകയുടെ ടോപ് സ്‌കോറര്‍. ആദ്യം ബാറ്റ് ചെയ്ത കേരളത്തിനായി ക്യാപ്റ്റന്‍ സജന 46 റണ്‍സെടുത്ത് ടോപ് സ്‌കോററായി. അക്ഷയ 39 റണ്‍സെടുത്തു. ദൃശ്യ, മിന്നു മണി എന്നിവര്‍ 20 വീതം റണ്‍സും കണ്ടെത്തി.