മട്ടന്നൂര്‍: എടയന്നൂരിലെ യൂത്ത് കോണ്‍ഗ്രസ് നേതാവ് എസ്.പി ശുഹൈബിനെ കൊലയാളി സംഘത്തിന് കാട്ടിക്കൊടുത്തയാള്‍ അറസ്റ്റില്‍. മട്ടന്നൂര്‍ കുമ്മാനം സ്വദേശിയും സി.പി.എം പ്രവര്‍ത്തകനുമായ സംഗീത് (27) ആണ് അറസ്റ്റിലായത്. ഇതോടെ കേസില്‍ അറസ്റ്റിലായവരുടെ എണ്ണം ഒന്‍പതായി. അതേസമയം, കഴിഞ്ഞ ദിവസം അറസ്റ്റിലായ കൊലയാളി സംഘത്തിലുണ്ടായിരുന്ന ജിത്തുവെന്ന ജിതിനെ കേസിലെ ദൃക്‌സാക്ഷികള്‍ തിരിച്ചറിഞ്ഞു. ഇന്നലെ കണ്ണൂര്‍ സ്‌പെഷല്‍ സബ് ജയിലില്‍ നടന്ന തിരിച്ചറിയല്‍ പരേഡിലാണ് തിരിച്ചറിഞ്ഞത്. ശുഹൈബിനൊപ്പമുണ്ടായിരുന്നു നൗഷാദ്, റിയാസ് എന്നിവര്‍ ഉള്‍പ്പെടെ മൂന്നുപേരാണ് ജിതിനെ തിരിച്ചറിഞ്ഞത്. കണ്ണൂര്‍ ഫസ്റ്റ് ക്ലാസ് മജിസ്‌ട്രേറ്റാണ് തിരിച്ചറിയല്‍ പരേഡ് നടത്തിയത്. ഇവര്‍ നേരത്തേ ആകാശിനെയും റിജിന്‍ രാജിനെയും തിരിച്ചറിഞ്ഞിരുന്നു.
കഴിഞ്ഞ മാസം 12ന് മട്ടന്നൂര്‍ തെരൂരിലെ തട്ടുകടയില്‍ ഭക്ഷണം കഴിച്ചുകൊണ്ടിരിക്കെയാണ് ശുഹൈബിനെ അക്രമിസംഘം വെട്ടിക്കൊലപ്പെടുത്തിയത്. വെട്ടിക്കൊലപ്പെടുത്തുന്നതിന് ദിവസങ്ങള്‍ക്ക് മുന്‍പേ കൊലയാളിസംഘം ശുഹൈബിനെ പിന്തുടര്‍ന്നിരുന്നു. ശുഹൈബിന്റെ മുഴുവന്‍ നീക്കങ്ങളും കൊലയാളി സംഘത്തെ അറിയിച്ചിരുന്നത് പ്രദേശം നന്നായി അറിയാവുന്ന സംഗീതാണെന്ന് പൊലിസ് തിരിച്ചറിഞ്ഞിരുന്നു. ശുഹൈബ് ഈ തട്ടുകടയിലുണ്ടെന്ന വിവരം കൊല നടന്ന രാത്രി സംഘത്തിന് നല്‍കിയതും ഇയാളാണ്. ഈ വിവരങ്ങളുടെയും കൊലയാളി സംഘാംഗങ്ങളുടെ മൊഴിയുടെയും അടിസ്ഥാനത്തിലാണ് അറസ്റ്റ്.
അറസ്റ്റിലായ സംഗീതിനെ ഇന്നലെ രാത്രിയോടെ മട്ടന്നൂര്‍ മജിസ്‌ട്രേറ്റിനു മുന്‍പാകെ ഹാജരാക്കി റിമാന്‍ഡ് ചെയ്തു. ആയുധങ്ങള്‍ ഒളിപ്പിക്കാനും വാഹനം മാറിക്കയറി രക്ഷപ്പെടാനും പ്രതികളെ സഹായിച്ച പാലയോട് സ്വദേശികളായ സഞ്ജയ്, രജത് എന്നിവരെ കഴിഞ്ഞദിവസം അറസ്റ്റ് ചെയ്തിരുന്നു. ഇതോടെ കൊലപാതകത്തില്‍ നേരിട്ട് പങ്കെടുത്ത നാലുപേരെയും സഹായികളായ അഞ്ചുപേരെയുമാണ് അറസ്റ്റ് ചെയ്തത്. ഇനി കൊലപാതകത്തില്‍ നേരിട്ട് പങ്കെടുത്ത ഒരാളെയും ആസൂത്രണം ചെയ്തവരെയും പിടികൂടാനുണ്ട്. കൃത്യത്തില്‍ നേരിട്ട് പങ്കെടുത്ത ഒരാളെ കണ്ടെത്താനുള്ള ശ്രമങ്ങള്‍ നടത്തിവരികയാണ് പൊലിസ്. ഇയാളെ പിടികൂടിയാല്‍ ഗൂഢാലോചന സംബന്ധിച്ച കൂടുതല്‍ വിവരങ്ങള്‍ ലഭിക്കുമെന്ന പ്രതീക്ഷയിലാണ് പൊലിസ്.