കൊച്ചി: പ്രകൃതിവിഭവങ്ങള്‍ കോര്‍പറേറ്റുകള്‍ക്ക് പിടിച്ചെടുത്തു നല്‍കുന്നതിന് മുന്‍പ് സര്‍ക്കാര്‍ ജനങ്ങളുടെ അഭിപ്രായം ചോദിക്കാന്‍ ബാധ്യസ്ഥരാണെന്ന് പ്രമുഖ പരിസ്ഥിതി പ്രവര്‍ത്തക മേധാ പട്കര്‍.'ആധുനിക അധിനിവേശങ്ങളും ജനകീയ ബദലുകളും' എന്ന വിഷയത്തില്‍ പുതുവൈപ്പ് എല്‍.എന്‍.ജി സമരവേദിയില്‍ പ്രഭാഷണം നടത്തുകയായിരുന്നു മേധാ പട്കര്‍.
ഓരോ പ്രദേശത്തെയും പ്രകൃതിവിഭവങ്ങള്‍ പിടിച്ചെടുക്കുന്നതിന് മുന്‍പ് ആ പ്രദേശത്ത് പരമ്പരാഗതമായി താമസിക്കുന്നവരുടെ അനുവാദം വാങ്ങേണ്ടതുണ്ട്. ആദിവാസികള്‍ക്ക് അവരുടെ മേഖലകളില്‍ സ്വയംഭരണാധികാരമുള്ളതുപോലെ ഓരോ മേഖലയിലെയും ജനങ്ങള്‍ക്ക് അവരുടെ പ്രകൃതി വിഭവങ്ങളിന്‍മേല്‍ അധികാരമുണ്ട്.
കടല്‍ത്തീരത്തിന്റെ അവകാശം കടല്‍ത്തീരത്ത് തലമുറകളായി ജീവിക്കുന്ന കടലിന്റെ മക്കള്‍ക്കുണ്ട്. ഇതൊന്നും മാനിക്കാതെയാണ് തീരം കോര്‍പറേറ്റുകള്‍ക്ക് തീറെഴുതിക്കൊടുത്തുകൊണ്ടിരിക്കുന്നത്.
പ്രകൃതി വിഭവങ്ങള്‍ കോര്‍പറേറ്റുകള്‍ തിരിച്ചെടുക്കാനാകാത്ത വിധം നശിപ്പിച്ചുകൊണ്ടിരിക്കുകയാണ്. ഓരോ മേഖലയും കോര്‍പറേറ്റുകള്‍ കൈയടക്കിക്കൊണ്ടിരിക്കുന്നു. പ്രകൃതി വിഭവങ്ങളില്‍നിന്നു ഓരോ വിഭാഗം ജനങ്ങളും ആട്ടിയോടിക്കപ്പെടുകയാണ്.
തീരം മുഴുവന്‍ കൈയടക്കിയതോടെ പരമ്പരാഗതമായി ജോലി ചെയ്തിരുന്ന ലക്ഷക്കണക്കിനാളുകള്‍ വഴിയാധാരമായി. ഇടതുപക്ഷം ഭരിക്കുന്ന കേരളത്തില്‍ ജനങ്ങള്‍ ഇതുപോലെ സമരം ചെയ്യേണ്ടിവരുന്നത് നിര്‍ഭാഗ്യകരമാണെന്നും മേധാ പട്കര്‍ അറിയിച്ചു.
ജനാരോഗ്യ പ്രസ്ഥാനവും എല്‍.എന്‍.ജി സമരസമിതിയും ചേര്‍ന്ന് സംഘടിപ്പിച്ച പരിപാടിയില്‍ ജേക്കബ് വടക്കന്‍ചേരി, ജയഘോഷ്, വിനോദ് കോശി, മജീന്ദ്രന്‍, കെ.വി സുഗതന്‍ സംസാരിച്ചു.