മുംബൈ: നേരത്തെ എഴുന്നേല്‍ക്കുകയോ രുചിയുള്ള ഭക്ഷണം ഉണ്ടാക്കിതരികയോ ചെയ്യാത്ത ഭാര്യയുമായുള്ള വിവാഹ മോചനം ആവശ്യപ്പെട്ട് നല്‍കിയ ഹരജി മുംബൈ ഹൈക്കോടതി തള്ളി.
മുംബൈ സാന്താക്രൂസ് സ്വദേശിയാണ് ഭാര്യക്കെതിരേ ആരോപണങ്ങള്‍ ഉന്നയിച്ച് വിവാഹമോചനത്തിന് ഹരജി നല്‍കിയത്. ജോലിക്കാരിയായ യുവതി വീട്ടുജോലിയും ഭര്‍ത്താവിനേയും അദ്ദേഹത്തിന്റെ മാതാപിതാക്കളേയും പരിപാലിച്ചു കഴിയുന്നുണ്ടെന്ന് നിരീക്ഷിച്ച കോടതി പരാതിക്കാരന്റെ ആരോപണം അനുചിതമാണെന്ന് കണ്ടെത്തി. നേരത്തെ ഈ ആരോപണം ഉന്നയിച്ച് കുടുംബ കോടതിയെ സമീപിച്ചിരുന്നു. അവിടെ നിന്ന് ഹരജി തള്ളിയതിനെ തുടര്‍ന്നാണ് ഹൈക്കോടതിയെ സമീപിച്ചത്. ആരോപണത്തെ ഭര്‍തൃപിതാവ് അനുകൂലിച്ചുകൊണ്ടുള്ള സത്യവാങ്മൂലവും കോടതിയില്‍ സമര്‍പ്പിച്ചിരുന്നു. വൈകീട്ട് ആറിന് ജോലി കഴിഞ്ഞ് എത്തുന്ന ഭാര്യ വിശ്രമിച്ച ശേഷം രാത്രി എട്ടരയോടെയാണ് ഭക്ഷണം പാകം ചെയ്യുന്നതെന്നും ഹരജിയില്‍ ആരോപിച്ചിരുന്നു. എന്നാല്‍ പരാതി തള്ളിയ യുവതി, വീട്ടിലുള്ള എല്ലാവര്‍ക്കും ഭക്ഷണം പാകം ചെയ്യുന്നുണ്ടെന്നും ഇതിന് തെളിവായി അയല്‍വാസികളുടെ സമ്മത പത്രവും കോടതിയില്‍ ഹാജരാക്കിയിരുന്നു.